مەجٸلٸس دەپۋتاتى اسحات ايماعامبەتوۆ سەمەيدە جاڭا جىلدىق شىرشانى بەزەندٸرۋ كەزٸندە اۋىر جاراقات العان مۇعالٸمگە بايلانىستى پٸكٸر بٸلدٸردٸ. ول بۇل جاعدايدى “جاڭساقتىق” دەپ قاراستىرۋعا بولمايتىنىن, مۇنداي وقيعالار پەداگوگتەردٸڭ قۇقىعىن ٶرەسكەل بۇزاتىنىن اتاپ ٶتتٸ, دەپ حابارلايدى Dalanews.kz.
“پەداگوگ مەرتەبەسٸ تۋرالى” زاڭنىڭ 6-بابىندا مۇعالٸمدەردٸ كەسٸبي مٸندەتتەرٸنە جاتپايتىن جۇمىستارعا تارتۋعا قاتاڭ تىيىم سالىنعان. جاڭا جىلدىق شىرشا ورناتۋ, كٶشە تازالاۋ, باسقا دا ناۋقاندارعا مەجبٷرلەپ قاتىستىرۋ سيياقتى ەسكٸ “دەستٷرلەردەن” بٸرجولا باس تارتۋىمىز كەرەك. بۇل – زاڭدى ٶرەسكەل بۇزۋ”, – دەدٸ دەپۋتات.
اسحات ايماعامبەتوۆ وسى جاعدايعا بايلانىستى ناقتى شارالار قابىلداۋ قاجەت ەكەنٸن العا تارتتى:
1. وبلىس باسشىلىعى بۇل وقيعانى مۇقييات تەرگەپ, جاۋاپتى تۇلعالاردى جازالاۋى تيٸس.
2. مۇعالٸمدەردٸ كەسٸبي مٸندەتٸنە جاتپايتىن جۇمىستارعا تارتۋدى توقتاتۋ ٷشٸن مينيسترلٸك باقىلاۋدى كٷشەيتۋٸ قاجەت.
3. بٸلٸم باسقارمالارى مەن مەكتەپ ەكٸمشٸلٸكتەرٸ پەداگوگتاردىڭ قۇقىقتارىن قاتاڭ ساقتاۋ بويىنشا ٶز مٸندەتتەرٸن ورىنداۋى تيٸس.
“مەملەكەت باسشىسى ەردايىم مۇعالٸمدەردٸڭ مەرتەبەسٸن قورعاۋ مەن ولاردىڭ قۇقىقتارىن ساقتاۋ مەسەلەسٸن ەرەكشە نازاردا ۇستاپ كەلەدٸ. بٸزدٸڭ مٸندەتٸمٸز – سول تالاپتاردى ورىنداپ, زاڭنىڭ جۇمىس ٸستەۋٸن قامتاماسىز ەتۋ”, – دەدٸ ايماعامبەتوۆ.
دەپۋتات جاراقات العان مۇعالٸم مينيسترلٸكتٸڭ باقىلاۋىندا ەكەنٸن جەتكٸزدٸ.
“جاراقات العان ەرٸپتەسٸمٸزگە تەزٸرەك ساۋىعىپ كەتۋٸن تٸلەيمٸن. مينيسترلٸكتٸڭ بۇل مەسەلەنٸ باقىلاۋعا العانى – ٷمٸت بەرەدٸ”, — دەپ قوستى ول.
ەسكە سالايىق, بۇل جاعدايدى وقۋ-اعارتۋ مينيسترٸ عاني بەيسەمباەۆ Facebook-تەگٸ پاراقشاسىندا مەلٸم ەتكەن ەدٸ.
مينيستر اتالعان وقيعاعا بايلانىستى وبلىس باسشىلىعى ەدٸل ەرٸ جان-جاقتى تەكسەرۋ جٷرگٸزۋ كەرەك ەكەنٸن ايتتى.
"سەمەي قالاسىندا مۇعالٸمدەردٸ جاڭاجىلدىق شىرشانى بەزەندٸرۋگە تارتۋ جەنە ەرٸپتەسٸمٸزدٸڭ وسى ٸس بارىسىندا جاراقات الۋى — زاڭ بۇزۋشىلىقتىڭ ايقىن كٶرٸنٸسٸ. پەداگوگتەردٸ كەسٸبي مٸندەتتەرٸنە جاتپايتىن مۇنداي جۇمىستارعا تارتۋ — «پەداگوگ مەرتەبەسٸ تۋرالى» زاڭدى ٶرەسكەل بۇزۋ دەپ سانايمىن. بۇل وقيعاعا بايلانىستى وبلىس باسشىلىعى ەدٸل ەرٸ جان-جاقتى تەكسەرۋ جٷرگٸزٸپ, الداعى ۋاقىتتا مۇنداي كەلەڭسٸزدٸكتەردٸڭ قايتالانۋىنا جول بەرمەۋ ٷشٸن تيٸستٸ شارالار قابىلدايدى دەپ ٷمٸتتەنەمٸن", — دەپ جازدى ول.
