Básekelestikti qorǵaý jáne damytý agenttigi astyq qabyldaý kásiporyndary kórsetetin qyzmetter naryǵynda birqatar zańbuzýshylyqtardy anyqtady, dep habarlaidy Dalanews.kz.
"Onyń ishinde astyqty qabyldaýdan bas tartý, kemsitýshilik jaǵdailardy belgileý, demalys kúnderi tarifterdi negizsiz kóterý faktileri tirkeldi. Agenttiktiń aralasýy nátijesinde tarifter 25 paiyzǵa deiin tómendetilip, aýyl sharýashylyǵy taýar óndirýshileri úshin teń qoljetimdilik qamtamasyz etildi", delingen BQDA habarlamasynda.
Jalpy alǵanda, jumys qorytyndysy boiynsha agenttik 23 eskertý shyǵardy, nusqama berdi, ákimshilik aiyppul salýmen tergep-tekserý júrgizdi, sondai-aq birqatar monopoliiaǵa qarsy komplaenster jasaldy.
Sonymen qatar salanyń damýyn tejeitin júieli kedergiler de aiqyndaldy. Protsesterdiń edáýir bóligi áli de qolmen júrgiziledi, bul maýsymdyq kezeńde kezekter men shamadan tys júktemelerge ákeledi.
Qosymsha táýekel retinde Qoldau júiesinde astyq qolhattaryn tirkeý jáne abonenttik tólemniń joǵary bolýy ataldy. Bul másele boiynsha fermerlerden shaǵymdar tústi. Jumys nátijesinde atalǵan sýbekt arnaiy quqyqtyń memlekettik tizilimine engizildi, sondai-aq qyzmetter qunyna saraptama júrgizilýde. Budan bólek, iri kásiporyndardyń litsenziiasyz jumys istep otyrǵany anyqtaldy, bul astyqtyń saqtalýyna kepildikti tómendetedi jáne adal oiynshylardy teń emes jaǵdaiǵa qoiady.
Mańyzdy problemalardyń biri – astyq qabyldaý kásiporyndarynyń tozýy. Osyǵan bailanysty agenttik kásiporyndarǵa jeńildetilgen nesie berý múmkindikterin keńeitýdi usyndy.
