Áielder arasynda 1500 metrde elordalyq Alina Daýranova qarsylas shaq keltirmedi. Daria Gavrilova (Astana) kúmis, Aliona Lifatova (Pavlodar oblysy) qola medalge qol jetkizdi. Erler arasynda Vadim Iakýbovskii (Qostanai oblysy) chempion atansa, Roman Binazarov (Qostanai oblysy) pen Mihail Glýshenko (Almaty) odan keiingi tuǵyr satysyna kóterildi.
Ulttyq qurama sportshysy Alina Daýranova mass-startta da márege birinshi kelip, osy oiyndardaǵy 6-altynyn moinyna taqty. Qalǵan júldeni Soltústik Qazaqstan oblysynyń ókilderi Kristina jáne Alina Shýmekovalar ielendi.
Osy maýsymdaǵy sońǵy jarysta sátti óner kórsetken jerlesimiz Alina Daýranova jarystan keiin óz áserimen bólisti.
– Bul maýsymdaǵy jarystyń bárinde barynsha jaqsy nátije kórsetýge tyrystym. Alǵash ret eresekter arasynda synǵa tústim. Munda bizben birge jasóspirimder de jarysty. Olar úshin tájiribe jinaityn taptyrmas alań boldy. Oiyndardaǵy kórsetkishterime kóńilim tolady. Úsh kúnde 6 altyn medal aldym. Endi az-kem demalystan soń kelesi maýsymǵa daiyndyqty bastaimyz, – dedi ol.
Konkimen júgirýden IV qysqy Jastar sport oiyndarynda jalpy esepte Astana qalasy jeńiske jetse, Qostanai oblysy 2-orynǵa, al Almaty qalasynyń komandasy 3-satyǵa turaqtady.
Aita keteiik, keshendi jarysqa 8 oblys pen 2 qaladan barlyǵy 120 tańdaýly konkishi qatysty.
