Astanada tórt balanyń ómirin jalmaǵan qaiǵyly jaǵdaiǵa bailanysty Astana ákimi Jeńis Qasymbek pikir bildirdi, dep habarlaidy Dalanews.kz.
Onyń aitýynsha, qaza tapqan tórt balanyń otbasyna kelesi jyly páter tabystalady.
“Bul másele baqylaýymyzda. Qazirgi tańda olarǵa ýaqytsha jataqhana berildi. Otbasy "kópbalaly otbasy" sanaty boiynsha turǵyn úi alý kezeginde tur. Kelesi jyly kezegi keledi jáne zańǵa sáikes, sol kezekpen qala beredi. Biz bul máseleni qosymsha qarap, sheshim shyǵaramyz”, – dedi ákim.
Aita keteiik, buǵan deiin Astanadaǵy eki qabatty jeke turǵyn úide bolǵan órt saldarynan qaza tapqan tórt balanyń otbasylaryna jergilikti ákimdik kómek kórsetetini habarlanǵan edi.
Ákimdiktiń málimetinshe, órt bolǵan úide eki otbasy turǵan. Qaiǵyly oqiǵa bolǵan otbasyǵa psihologiialyq, materialdyq, turǵyn úi jáne basqa da qajetti kómek kórsetiledi.
“Qaza tapqan balalardyń jaqyndaryna kóńil aitamyz. Zardap shekken ekinshi otbasy ýaqytsha turǵyn úige ornalastyryldy. Ákimdik qyzmetkerleri eki otbasymen turaqty bailanysta bolyp, barlyq qajetti kómekti kórsetip jatyr”, — dedi ákimdik.
Eske salaiyq, Astanada eki qabatty jeke turǵyn úide bolǵan órttiń saldarynan úidiń shatyry qulap, tórt bala — 2 men 13 jas aralyǵyndaǵy balalar kóz jumǵan bolatyn.
Qazirgi tańda oqiǵanyń sebepteri anyqtalyp jatyr. Jergilikti bilik ókilderi turǵyndarǵa órt qaýipsizdigi erejelerin saqtaý kerek ekenin eskertti.
