Astana qalasynyń Dostyq úıinde Medıasıa kúnine arnalǵan is-shara ótti. Basqosýǵa Qazaqstan halqy Assambleıasynyń qoǵamdyq jáne kásibı medıatorlary, úkimettik emes uıymdardyń, memlekettik organdardyń ókilderi qatysty,- dep habarlaıdy Dalanews.kz 

Jıyn barysynda qoǵamdaǵy toleranttylyq, medıasıa máseleleriniń mańyzdy aspektileri jáne búkilqazaqstandyq birliktiń biregeı modelin qalyptastyrýda Qazaqstan halqy assambleıasynyń róli týraly sóz etildi. Sondaı-aq qatysýshylar medıasıa ınstıtýtynyń mańyzdylyǵyna toqtalyp, bul kezdesýdiń aldaǵy jumysty tıimdi júrgizý úshin bereri kóp ekendigin atap ótti.

Jıynǵa qatysýshylardyń aıtýynsha, elimizde 2 myńǵa jýyq qoǵamdyq, 100-den astam kásibı medıator bar. Alaıda olar negizinen otbasylyq, turmystyq daý-janjal kezinde jumys júrgizedi. Sondyqtan etnıkalyq kelispeýshilik kezinde eki tarapty ymyraǵa keltire alatyn medıatıvtik tehnologıany tereń meńgergen mamandarǵa suranys joǵary. Semınardyń negizgi maqsaty da medıasıanyń dál osy baǵytyn keńinen túsindirý boldy.

«Mádenı erekshelikterine, salt-dástúr, ádep-ǵurypqa, sonyń bárine medıasıada nazar aýdarylady, ásirese etnomedıasıada.

Árbir ulttyń, ol túgili árbir adamnyń óz erekshelikteri bar. Qaı otbasydan, qaı jerden shyqty, qaı jerde tárbıelendi? Sonyń barlyǵyn etnomedıasıa eskere otyryp, kelissózder júrgizýge nazar aýdarady», - deıdi kásibı medıator Symbat Shakırov.

İs-shara sońynda qatysýshylar ózara pikir almasyp, qoǵamdyq kelisimdi nyǵaıtý boıynsha keleli oılary men usynystaryn ortaǵa saldy.