Astanadaǵy at sporty kesheni 200 myńǵa satylyp, 7 mlrd-qa qaita satyp alynǵan. Prokýratýra júrgizgen tekseris nátijesinde zańbuzýshylyqtar anyqtalmaǵan, dep habarlaidy Dalanews.kz.
"2016 jyly «Astana» atty at sporty klýby bastapqy baǵasy 41 mln teńge bola tura, aýktsionda nebári 198 000 teńgege satylǵan. Lot quramynda jylqylar, avtokólik jáne tehnika bolǵanyna qaramastan, bilik ókilderi «tek ataýy satyldy» dep túsindirdi. Alaida baǵalaý qujattarynda múlik bar ekeni kórsetilgen, al prokýratýra júrgizgen tekseris kútpegen jerden eshqandai zańbuzýshylyq tappady", - delingen Egovpress jazbasynda.
Eske salaiyq, 2016 jyly Astana ákimdigi «Tulpar» at sporty keshenin aýktsion arqyly nebári 200 myń teńgege satyp jibergen. Keiin qala biligi jańa «Arǵymaq» at sporty keshenin biýdjetten 7 mlrd teńgege qaita satyp alýǵa sheshim qabyldaǵan. Bul týraly qalalyq máslihat depýtaty Vladislav Sergeev málimdedi
«2016 jyly «Tulpar» at sporty kesheni aýktsion arqyly óte kúlkili baǵaǵa – shamamen 200 myń teńgege satyldy. Budan keiin ótken shaqyrylymda bizge «Arǵymaq» atty jańa keshendi 7 mlrd teńgege satyp alý qajettigi máselesi kelip tústi. Depýtattardyń bir bóligi, sonyń ishinde ózim de, buǵan qarsy boldyq. Biraq kópshilik daýyspen satyp alý týraly sheshim qabyldanyp, ol oryndaldy», – dedi Sergeev.
Onyń aitýynsha, qazir bul keshendi jeke kompaniiaǵa senimgerlik basqarýǵa berý máselesi qarastyrylyp jatyr.
