Astanada inkliýzivti sport ortalyǵynyń qurylysy bastaldy. Qazaqstan bochcha federatsiiasynyń prezidenti Máýlen Áshimbaev qurylys jumystarynyń barysymen tanysyp, sport ortalyǵynyń irgetasyn qalaý rásimine qatysty, dep habarlaidy Dalanews.kz.
Máýlen Áshimbaev elordada atalǵan sport ortalyǵyn salý ádiletti memleket qurý jolyndaǵy mańyzdy qadam ekenin atap ótti. Memleket basshysy elimizde inkliýzivti qoǵam qalyptastyrýǵa jáne múgedektigi bar azamattarǵa teń múmkindikter beretin jaǵdai jasaýǵa úlken kóńil bólip keledi.
“Prezidentimiz Qasym-Jomart Kemeluly Toqaev árbir azamattyń damýyna jáne óz áleýetin júzege asyrýyna jaǵdai jasalǵan ádiletti qoǵam qurýdyń mańyzdy ekenin únemi aityp keledi. Jańa Inkliýzivti sport ortalyǵy múgedektigi bar sportshylardyń alańsyz jattyǵý jasaýyna, halyqaralyq jarystarǵa daiyndalýyna jáne jańa biikterdi baǵyndyrýyna jol ashatyn orynǵa ainalady dep senemiz. Munda bochcha, basketbol, arbamen oinaityn fýtbol, golbol, otyryp oinaityn voleibol jáne taǵy basqa sport túrlerine arnalǵan zaldar bolady. Bul qadam sportshylarymyzǵa halyqaralyq jarystarǵa joǵary deńgeide daiyndalýǵa múmkindik beredi”, – dedi Máýlen Áshimbaev.
Sonymen qatar Senat tóraǵasy mundai ortalyqty salý tek sporttaǵy jetistikterge ǵana yqpal etip qoimai, ár azamattyń ómirden óz ornyn tabýyna, kóppen aralasyp, qarym-qatynas jasaýyna jáne bir-birin qoldaýǵa beriletin zor múmkindik ekenin aitty. Munyń bári – múgedektigi bar balalardy úlken ómirge beiimdeýdiń jáneqoǵamda durys qundylyqtar júiesin dáripteýdiń tiimdi tetigi.
Sondai-aq Máýlen Áshimbaev jobany iske asyrýǵa uiytqy bolǵan Astana qalasynyń ákimdigine jáne inkliýzivti sportty damytýǵa, parasportshylarǵa jaǵdai jasaýǵa atsalysyp júrgen belsendi azamattarǵa alǵys bildirdi.
Saltanatty rásimge Astana qalasynyń ákimi Jeńis Qasymbek, Týrizm jáne sport vitse-ministri Serik Jarasbaev, parasport federatsiialarynyń basshylary men músheleri jáne taǵy basqa múddeli taraptar qatysty.
