Astanada ulttyq qundylyqtar men kreativti indýstriiany ushtastyrǵan erekshe joba – «Uly dala qolónershiler kerýen kóshi» ótti,- dep habarlaidy Dalanews.kz
Jobany Astana qalasy ákimdiginiń qoldaýymen «Has sheber» otandyq ónimdi damytý qaýymdastyǵy uiymdastyrdy. Onyń basty maqsaty – dástúrli qazaq qolónerin zamanaýi formatta qaita jańǵyrtyp, etnodizaindy damytý jáne shyǵarmashylyq indýstriiany qoldaý.
Is-shara aiasynda etno-óner kórmesi, jármeńke, sán kórsetilimi, sheberlik synyptary men jastarǵa arnalǵan dárister uiymdastyryldy. Kelýshiler ulttyq naqyshta jasalǵan ekskliýzivti buiymdardy satyp alyp qana qoimai, otandyq dizainerler usynǵan zamanaýi etnokiim úlgilerin tamashalady.
«Mundai is-sharalar halyqtyń ulttyq mádenietke degen qyzyǵýshylyǵyn arttyryp, otandyq ónimge suranysty qalyptastyrady. Biz osyndai jobalardyń jii ótýin qalaimyz", - deidi «Has sheber» qaýymdastyǵynyń múshesi, qolóner sheberi Juldyzai Babasova.
Jármeńkege 15-ke jýyq sheber qatysyp, kiim-keshek, aiaq kiim, sómke, zergerlik áshekeiler men turmystyq buiymdaryn usyndy. Juldyzai Babasova óz qolymen toqyp jasaǵan krossovki, mokasin, shlepki sekildi erekshe aiaq kiimderin de kópshilik nazaryna usyndy.
«Meniń aiaǵymda ortopediialyq erekshelik bolǵandyqtan, ózim úshin arnaiy aiaq kiim toqýdy bastaǵanmyn. Qazir bul – súiikti isime ainaldy. Sapaly jipter men tabandardy paidalanyp, yńǵaily ári erekshe ónim shyǵaramyn", - deidi is-sharaǵa qatysýshy sheber.
Jobaǵa qatysqan taǵy bir dizainer – Aigerim Úsina. Ol kiizden ulttyq stilde sándik buiymdar men kiimder jasaidy. Onyń aitýynsha, qolóner – shyǵarmashylyq pen rýhani bailanystyń erekshe túri.
«Meniń negizgi baǵytym – avtorlyq qolóner buiymdary. Ózim oilap tapqan, patenttelgen «han bas kiimderin» usynamyn. Kiiz basý isimen kópten ainalyspasam da, túrli kórmelerge qatysyp úlgerdim», - deidi dizainer.
Joba tek bir rettik shara emes. Uiymdastyrýshylardyń aitýynsha, ol otandyq ónimdi tutyný mádenietin qalyptastyrý, kreativti jastar men sheberler arasyndaǵy yntymaqtastyqty kúsheitý jáne ulttyq murany qazirgi zaman talabyna sai jańǵyrtý mindetterin kózdeidi.
«Osyndai ádemi ulttyq kiimderdi kúndelikti ómirde de kiiýge bolady. Bul – sán ǵana emes, tamyrymyzǵa oralý, ulttyq bolmysymyzdy dáripteý. Biz Re.women qaýymdastyǵy retinde bul bastamany tolyq qoldaimyz», – dedi Respublica partiiasynyń «Re.women» áielder qaýymdastyǵynyń tóraiymy Sáýle Saǵdi.
Uiymdastyrýshylardyń aitýynsha, «Uly dala qolónershiler kerýen kóshi» elimizdiń túkpir-túkpirindegi daryndy qolónershilerge serpin berip, otandyq shyǵarmashylyq indýstriianyń damýyna jol ashady.
