Áleýmettik jelilerde Astanada túsirilgen video tarady: keýdesi orden-medalǵa toly qart kisi áskeri paradty tribýnadan kórý úshin kúzet qyzmetkerlerinen ótýge ruqsat surap tur. Beinejazba jurt arasynda keńinen talqylanyp, rezonans týdyrdy, dep habarlaidy Dalanews.kz.
Qart ardager kúzetshilerge kýáligin kórsetip, keshigip qalǵanyna keshirim surai otyryp, tribýnaǵa ótkizýdi ótingen.
Dalanews.kz tilshisi bul jaitqa qatysty Astana ákimdiginen pikir surady. Ákimdik qyzmetkerleri tyl eńbekkeri Teńdik Izaqovtan keshirim surap, kóp jylǵy eńbegi úshin alǵys bildirgen.
Qalanyń jumyspen qamtý jáne áleýmettik qorǵaý basqarmasynyń basshysy Ilia Skýb, qalanyń Ishki saiasat basqarmasynyń basshysy Nurdáýlet Álmuhanov tyl eńbekkeri professor Teńdik Izaqovpen jáne onyń otbasymen kezdesip, kóp jylǵy eńbegi úshin alǵys bildirip, 7 mamyr kúni sherý ótetin orynǵa kire almaǵany úshin keshirim surady.
"Is-shara aýmaǵyna ótý arnaiy ázirlengen tizim boiynsha júzege asyryldy. Oryn sanynyń shektelýin, sondai-aq ardagerlerdiń jasy ulǵaiǵanyn eskere otyryp, tizim ardagerler men tyl eńbekkerleriniń týystarynan tikelei túsken ótinishter boiynsha ǵana ázirlendi", deidi ákimdik ókilderi.
Bul rette sherýge elimizdiń barlyq óńirinen ardagerler men tyl eńbekkerleri qatysty. Teńdik Izaqovtyń otbasynan ótinish túspegen.
"Astana ákimdigi Teńdik Izaqovqa jáne onyń jaqyndaryna týyndaǵan jaǵdaiǵa bailanysty shyn júrekten keshirim surady. Teńdik Izaqov 9 mamyr kúni gúl shoqtaryn qoiý rásimine shaqyryldy", delingen jaýapta.
