الەۋمەتتىك جەلىلەردە استانادا تۇسىرىلگەن ۆيدەو تارادى: كەۋدەسى وردەن-مەدالعا تولى قارت كىسى اسكەري پارادتى تريبۋنادان كورۋ ءۇشىن كۇزەت قىزمەتكەرلەرىنەن وتۋگە رۇقسات سۇراپ تۇر. بەينەجازبا جۇرت اراسىندا كەڭىنەن تالقىلانىپ، رەزونانس تۋدىردى، دەپ حابارلايدى Dalanews.kz.

قارت ارداگەر كۇزەتشىلەرگە كۋالىگىن كورسەتىپ، كەشىگىپ قالعانىنا كەشىرىم سۇراي وتىرىپ، تريبۋناعا وتكىزۋدى وتىنگەن.

Dalanews.kz ءتىلشىسى بۇل جايتقا قاتىستى استانا اكىمدىگىنەن پىكىر سۇرادى. اكىمدىك قىزمەتكەرلەرى تىل ەڭبەككەرى تەڭدىك يزاقوۆتان كەشىرىم سۇراپ، كوپ جىلعى ەڭبەگى ءۇشىن العىس بىلدىرگەن. 

قالانىڭ جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى يليا سكۋب، قالانىڭ ىشكى ساياسات باسقارماسىنىڭ باسشىسى نۇرداۋلەت ءالمۇحانوۆ تىل ەڭبەككەرى پروفەسسور تەڭدىك يزاقوۆپەن جانە ونىڭ وتباسىمەن كەزدەسىپ، كوپ جىلعى ەڭبەگى ءۇشىن العىس ءبىلدىرىپ، 7 مامىر كۇنى شەرۋ وتەتىن ورىنعا كىرە الماعانى ءۇشىن كەشىرىم سۇرادى.

"ءىس-شارا اۋماعىنا ءوتۋ ارنايى ازىرلەنگەن ءتىزىم بويىنشا جۇزەگە اسىرىلدى. ورىن سانىنىڭ شەكتەلۋىن، سونداي-اق ارداگەرلەردىڭ جاسى ۇلعايعانىن ەسكەرە وتىرىپ، ءتىزىم ارداگەرلەر مەن تىل ەڭبەككەرلەرىنىڭ تۋىستارىنان تىكەلەي تۇسكەن وتىنىشتەر بويىنشا عانا ازىرلەندى"، دەيدى اكىمدىك وكىلدەرى. 

بۇل رەتتە شەرۋگە ەلىمىزدىڭ بارلىق وڭىرىنەن ارداگەرلەر مەن تىل ەڭبەككەرلەرى قاتىستى. تەڭدىك يزاقوۆتىڭ وتباسىنان ءوتىنىش تۇسپەگەن. 

"استانا اكىمدىگى تەڭدىك يزاقوۆقا جانە ونىڭ جاقىندارىنا تۋىنداعان جاعدايعا بايلانىستى شىن جۇرەكتەن كەشىرىم سۇرادى. تەڭدىك يزاقوۆ 9 مامىر كۇنى گۇل شوقتارىن قويۋ راسىمىنە شاقىرىلدى"، دەلىنگەن جاۋاپتا.