Elordada qurylys qaldyqtaryn zańsyz tógý faktilerin anyqtaý jáne jolyn kesý boiynsha júieli jumys jalǵasyp jatyr. «Taza Qazaqstan» ekologiialyq aktsiiasy aiasynda politsiia qyzmetkerleri quqyq qorǵaý organdarynyń zańdy talaptaryn elemeý jaǵdailaryn tirkedi, dep habarlaidy Dalanews.kz.
Máselen, qalaǵa kireberiste 39 jastaǵy júrgizýshi basqarǵan HOWO SINOTRUK júk kóligi toqtatyldy. Politsiia qyzmetkerleriniń talaptaryna baǵynbai, jol qozǵalysyn jalǵastyrǵan. Túsindirý jumysy júrgizilgenine qaramastan, júrgizýshi taǵy da talaptardy elemei, joldyń júris bóligine usaq tastardy tógip, jol qaýipsizdigine qaýip tóndirip, jol jabynyna ziian keltirgen. Sot sheshimimen oǵan 18 táýlikke ákimshilik qamaý jazasy taǵaiyndaldy.
Sonymen qatar túngi ýaqytta Astrahan tas joly mańynan tekserý kezinde eki júk kóligi toqtatyldy. Júrgizýshiler tekseristen ótýden bas tartqan. Kóp uzamai oqiǵa ornyna olardyń basshysy – «ARE» JShS-niń iesi kelip, politsiia qyzmetkerleriniń zańdy talaptaryna kómektesýdiń ornyna, ádeii júrgizýshilerge tasymaldanyp jatqan topyraqty joldyń ústine tógý týraly nusqaý bergen.
Olardyń kelisilgen áreketteriniń saldarynan jol infraqurylymyna ziian keltirilip, politsiia qyzmetkerlerine ashyq túrde baǵynbaý deregi oryn aldy.
Júrgizýshiler joldar men jol qurylystaryn búldirgeni úshin jáne olar basshysymen birge politsiia qyzmetkerleriniń zańdy talaptaryna baǵynbaǵany úshin de jaýapqa tartyldy.
Sot sheshimimen olardyń árqaisysyna 15 táýlikke ákimshilik qamaý jazasy taǵaiyndaldy.
Astana qalasy Politsiia departamenti politsiia qyzmetkerleriniń zańdy talaptaryna baǵynbaý – óreskel quqyq buzýshylyq bolyp tabylatynyn jáne qatań jaýaptylyq sharalary kózdelgenin eskertedi. Kez kelgen quqyq qorǵaý organdarynyń talaptaryn elemeýge tosqaýyl qoiylady.
«Taza Qazaqstan» aktsiiasynyń basty maqsaty – ekologiialyq mádenietti qalyptastyrý, qala tazalyǵy men tártibin qamtamasyz etý, sondai-aq azamattardyń qorshaǵan ortaǵa degen jaýapkershiligin arttyrý.
