Astanada «Qazanat» ippodromynda «BaiQymyz – baptalǵan qymyz ulttyq taǵamdar gastrofestivali» atty iri kólemdegi mádeni-agrarlyq is-shara ótedi,- dep habarlaidy Dalanews.kz
Atalǵan festival halqymyzdyń dástúrli taǵam mádenietin, onyń ishinde qymyz óndirý dástúrin jańǵyrtý men halyqaralyq deńgeige ilgeriletýge baǵyttalǵan.
Sharaǵa 50-60 myń adam keledi dep josparlanyp otyr. Ár óńirden 50-ge jýyq qymyz óndirýshi qatysady. Festival Oktoberfest siiaqty halyqaralyq úlgidegi mádeni-agrarlyq brendke ainalýy kózdelip otyr. Qonaqtar eki kún boiy qymyzdyń túr-túrinen dám tatyp, jylqy tuqymdary tanystyrylatyn kórmeni tamashalap, etno-mádeni baǵdarlamalarǵa qatysa alady.
Festivaldiń erekshe júldesi – «Eń úzdik qymyz» ataǵy úshin jarys bolmaq. Baiqaý jeńimpazdary qomaqty qarjyǵa ie bolady, júlde qory – 45 million teńge (I oryn – 20 mln tg, II oryn – 15 mln tg, III oryn – 10 mln tg).
Baiqaýdyń maqsaty – elimizdegi eń sapaly ári shipaly qymyzdy anyqtaý. Negizgi maqsat – qymyzdy densaýlyq pen qonaqjailyqtyń simvoly retinde tanytý, sonymen qatar agrotýrizm men jylqy sharýashylyǵyn damytýǵa serpin berý.
Jylqy kórmesinde qazaqtyń baiyrǵy tuqymdary – Jaby, Kóshim, Qostanai, Muǵaljar, Adai jáne sporttyq baǵyttaǵy attar kópshilik nazaryna usynylady. Qolóner sheberleri er-toqym, qamshy, at ábzelderi siiaqty tarihi buiymdaryn kórsetip, kelýshiler olardy satyp ala alady. Kórmeniń basty ereksheligi – biregei buiymdar men jylqylarǵa arnalǵan aýktsion.
Festival aiasynda uiymdastyrylatyn ǵylymi konferentsiiada qymyzdyń emdik qasietteri, jylqy sharýashylyǵy men dástúrli mal sharýashylyǵynyń damý bolashaǵy talqylanady. Germaniia, Resei, Qyrǵyzstan elderinen kelgen ǵalymdar, dárigerler, veterinarlar men kásipkerler óz baiandamalaryn usynady.
Qatysýshylar arasynda Germaniialyq jylqy sharýashylyǵy mamany Hans Tsolman, meditsina ǵylymdarynyń doktory Baqytjan Bimbetov, etnograf Aigerim Musaǵajinova jáne basqa da sarapshylar bar.
Sheberlik sabaqtar barysynda qatysýshylarǵa qymyz daiyndaý, saqtaý, ashytý, sondai-aq ony kapsýla túrinde óndirýdiń zamanaýi ádisteri tanystyrylady. Sonymen qatar, teri ileý, at ábzelderi men turmystyq buiymdardy jasaý boiynsha da qolóner sheberleri óz bilgenin úiretedi.
Sondai-aq, baǵdarlama sheńberinde aýdaryspaq, asaý úiretý, qumai tazy saiysy, shalma salý syndy ulttyq sport túrlerinen jarystar ótkiziledi. Meshkeiler saiysy men jilik syndyrý sekildi erekshe sharalar festival kórigin qyzdyrmaq.
