Astanada Qazaqstan-Frantsiia investitsiialyq forýmy óz jumysyn bastady. Iri halyqaralyq jiynǵa Qazaqstan Respýblikasynyń Premer-ministri Oljas Bektenov, Frantsiia Respýblikasynyń Syrtqy saýda jáne sheteldegi frantsýz azamattary jónindegi ýákiletti ministri Loran Sen-Marten, sondai-aq eki eldiń memlekettik qurylymdary men isker toptarynyń ókilderinen quralǵan 300-ge jýyq delegat qatysty, dep habarlaidy Dalanews.kz.
Forým Qazaqstan ekonomikasynyń mańyzdy salalaryna — energetika, agroónerkásip kesheni, densaýlyq saqtaý, kólik infraqurylymy men ýrbanistikaǵa — frantsýz investitsiialaryn tartý jáne seriktestikti keńeitý máselelerin talqylaýǵa arnalǵan mańyzdy dialog alańyna ainaldy.
Biznes-forýmnyń ashylý saltanatynda sóilegen sózinde Úkimet basshysy Frantsiianyń Qazaqstan úshin Eýropalyq Odaq aiasyndaǵy basym seriktes ekendigin atap ótti.
“Qazaqstan – Frantsiianyń Ortalyq Aziiadaǵy jetekshi ekonomikalyq áriptesi. Frantsiianyń bul óńirmen jalpy saýda ainalymynyń 80 paiyzy bizdiń elge tiesili. Ótken jyly ekijaqty saýda kólemi 31 paiyzǵa artyp, rekordtyq 5,5 mlrd AQSh dollaryna jetti. Búginde Frantsiia Eýroodaq elderiniń ishinde Qazaqstan ekonomikasyna eń kóp qarjy quiǵan úsh iri investordyń qatarynda. Elde 200-den astam frantsýz kompaniiasy jumys isteidi, olardyń jalpy investitsiiasy 20 mlrd AQSh dollarynan asty. Bul elimizdiń ekonomikalyq ósimi men jańǵyrýyna úlken serpin berdi”, – dedi Oljas Bektenov.
Premer-ministr forým aiasynda júzege asyp jatqan iri qazaqstandyq-frantsýz jobalaryn da atap ótti. Mysaly, TotalEnergies kompaniiasy Ońtústik Qazaqstanda qýaty 1 gigavatt bolatyn aýqymdy jel elektr stantsiiasyn salyp jatyr. Al Alstom kompaniiasy temirjol kóligi salasynda óndiristi jergiliktendirip, investitsiialyq kelisimge qol qoidy. Sonymen qatar, Air Liquide kompaniiasy Pavlodar munai-himiia zaýytynda sýtegi óndirýge arnalǵan iri jobany júzege asyrýda. Jalpy alǵanda, forým aiasynda 15 kelisimge qol qoiyldy.
Óz kezeginde Frantsiia Respýblikasynyń ministri Loran Sen-Marten Qazaqstan Prezidenti Qasym-Jomart Toqaevtyń ótken jylǵy Frantsiiaǵa jasaǵan saparynan keiin eki el arasyndaǵy yntymaqtastyq jańa strategiialyq deńgeige kóterilgenin aitty.
“Búgin – Qazaqstan men Frantsiia arasyndaǵy saýda-ekonomikalyq jáne investitsiialyq bailanystar úshin mańyzdy kún. Biz infraqurylym, densaýlyq saqtaý, energetika jáne aqparattyq tehnologiialar salalarynda birlesken jobalardy iske asyrýǵa niettimiz. Munda jinalǵan frantsýz kompaniialary – óz salasynda mol tájiribesi bar, álemdik deńgeide moiyndalǵan, bedeldi biznes ókilderi. Bul – naǵyz frantsýz noý-haýy. Búgin biz strategiialyq seriktestigimizdi naqty ispen bekemdedik. Memlekettik jáne jeke sektor ókilderi tikelei kezdesip, ózara túsinistikke qol jetkizdi”, – dedi Loran Sen-Marten.
Ministr EDF – Frantsiianyń memlekettik energetikalyq korporatsiiasynyń tóraǵasy Bernar Fontananyń Astanaǵa arnaiy kelgenin de atap ótti. EDF – álemdegi eń iri atom elektr stantsiialaryn basqaratyn operator. Onyń aitýynsha, Frantsiia iadrolyq energetikada mol tájiribe jinaqtaǵan, bul saladaǵy úzdik tájiribe búginde Qazaqstanmen bólisýge daiyn.
Budan bólek, EDF, Orano, Axens, Assystem, Schneider Electric syndy jetekshi frantsýz kompaniialarymen energetika, atom jáne ónerkásiptik jobalarda tyǵyz seriktestik ornatylýda. Sonymen qatar, strategiialyq mańyzdy shikizat boiynsha arnaiy jol kartasy jasalyp, Eramet jáne Imerys kompaniialarymen litii, titan jáne sirek kezdesetin metalldar boiynsha jobalar qarastyrylyp jatyr.
Avtory: Aigerim Qali
