Astanada qyzmettik mindetin atqarý kezinde qaza tapqan feldsher Uldana Myrzýannyń ólimine qatysty qylmystyq is sotqa joldandy. Bul týraly elordalyq Politsiia departamenti málimdedi, dep habarlaidy dalanews.kz "Kazinform"-ǵa silteme jasap.
Derekke sáikes, Uldana Myrzýannyń qaza bolýyna bailanysty júrgizilgen sotqa deiingi tergeý aiaqtalyp, qylmystyq is sottyń qaraýyna jiberilgen.
«Azamatsha Uldana Myrzýannyń qaza bolý faktisi boiynsha sotqa deiingi tergep-tekserý aiaqtalyp, qylmystyq is sotqa joldandy», – dedi Astana qalasy Politsiia departamenti bastyǵynyń birinshi orynbasary Ábil Ábildin.
Astana qalalyq sotynyń baspasóz qyzmeti alǵashqy sot otyrysynyń kúni ázirge belgilenbegenin habarlady.
Eske salaiyq, 2025 jylǵy 8 qarashada Astanada toǵyz qabatty turǵyn úidiń qasbetindegi kirpish qaptama men konditsioner qulap túsken bolatyn. Oqiǵa ornyna kelgen jedel járdem feldsheri Uldana Myrzýan úiindi astynda qalǵan er adamǵa kómek kórsetýge tyrysqan sátte toǵyzynshy qabattan qulaǵan konditsioner onyń basyna túsken.
Dárigerler oǵan kúrdeli ota jasap, bas súiegine trepanatsiia júrgizgenimen, 18 qarasha kúni onyń qaitys bolǵany belgili boldy.
Marqumnyń erligi eskerilip, Prezident Qasym-Jomart Toqaevtyń Jarlyǵymen Uldana Myrzýan «Erligi úshin» medalimen marapattaldy.
