– Oǵan daýym joq. Aitsyn. Jurt jaqsy kórsin. Rinattyń ózi de biledi, qai jerde jaqsy aitqanyn, qai jerde jaqsy aitys jasai almaǵanyn.
Qazan aiynda Astanada ótken aitysta Rinat jaqsy aitys jasady. Bas júldeni daýsyz jeńip aldy. Oǵan eshkim kedergi keltirip jatqan joq. Biraq shyndyǵyn aitý kerek, bizdiń keibir úlken qalalar men oblystardaǵy aitystarǵa «Rinat Zaitov pen Aibek Qaliev qatyspasyn» degen talap qoiylady.
Óitkeni, osy aqyndar artyq birdeme aityp qoisa, salqyny ózimizge tiedi dep qorqady.
Mysaly, aldaǵy ailarda Astanada ótetin aitysqa Rinat, Aibek, Bekarysty ákelmeńiz degen eskertý hat aldym. Mine, kórem deseńiz, uialy telefonymda tur.
– Siz ótkizip jatqan aitystarǵa sheneýnikter kelip, otyryp tyńdai ma?
– Kerek bolsa, atyn atap, túsin tústep bereiin. Aitysty qoldap otyrǵan ákimderdiń biri – Atyraý oblysynyń ákimi Nurlan Noǵaev.
Sodan keiin Aqtóbe oblysynyń ákimi Berdibek Saparbaev (kúni keshe Saparbaev Eńbek jáne áleýmet ministri bolyp taǵaiyndaldy, red), Almatynyń ákimi Baýyrjan Baibek, Batys Qazaqstan oblysynyń ákimi Altai Kólginov, Qyzylorda oblysynyń ákimi Qyrymbek Kósherbaev siiaqty atqaminerler aitysqa qarjy shyǵaryp qana qoimai, kelip otyryp, óner dodasyn kórip, tamashalap qaitady.
Aqyndardyń aitqan syn-eskertpelerinen qorytyndy shyǵaryp, shara qoldanyp jatady.
Biraq Qaraǵandy oblysynan qanshama aqyn bar. Aqyny kóp bolǵanymen, jyr dodasyn ótkizýge shamalary kelmei otyr.
Qansha jyldan beri aityp-aityp, jamanatty boldym. «Abylaidy han kótergen Ulytaýdy násihattaiyq» dedim. Biraq oblys basshysy keri tartyp keledi.
«Rýhani jańǵyrý», «Uly dalanyń jeti qyry» dep jatyrmyz. Onda aitys ótkizeiik. Aitys uly dalanyń naǵyz rýhani óneri ǵoi.
Astanada aitys ótse, parlamenttegi depýtattarǵa, ministrliktegi aqjaǵalylarǵa júzdegen bilet taratylady. Men «Olar aitysqa kelmeidi. Áýre bolmańdar» deimin. Aitqanymdai, ol jaqtan eshkim kelmeidi. Kelse, sóz tiiýi múmkin?
Qazaq «Er bolsań bopsaǵa shyda» deidi ǵoi. Biraq olar sózge shydamaidy. Sondyqtan aitysqa at izin salmaidy.
Saýaldasqan, Jaras Kemeljan
