Elordadaǵy Ortalyq saiabaqta abattandyrý jumysy bastaldy. Jańartý jumysy 15 myń sharshy metrden astam aýmaqty qamtidy. Bul – «Qazaqstan kúni» monýmentinen bastap Esil ózeniniń jaǵalaýyna deiingi bólik,- dep habarlaidy Dalanews.kz
Bul jerde eski jáne zaqymdalǵan granit plitalar jańartylyp, kóshe jihazdaryn jóndeý jáne qalpyna keltirý jumystary júrgiziledi. Sondai-aq jaryqtandyrý júiesi, sándik shamdar men sýburqaq kesheniniń kommýnikatsiialaryn qosa alǵanda, injenerlik jelilerge aýqymdy jańǵyrtý jasalady.
Jańartýdyń basty elementteriniń biri – sýburqaq boiyndaǵy alleia bolady. Munda 150-den astam jóke jáne shyrsha aǵashy otyrǵyzylady. Jańa aǵashtar saiabaqqa ajar berip, serýendeýge qolaily jaily orta qalyptastyrady.
Jóndeý kezinde saiabaqtaǵy jaiaý júrginshiler bóligi ishinara jabylady, degenmen alleianyń bir jaǵy kelýshiler úshin ashyq bolady. Aýdan ákimdigi ýaqytsha qolaisyzdyqtar úshin keshirim suraidy.
Saiabaqty abattandyrý – elordanyń jasyl qoryn kóbeitý jáne qoǵamdyq keńistikterdi jaqsartý jónindegi júieli jumystyń bir bóligi.
