Astanada Ortalyq Aziiadaǵy alǵashqy Áleýmettik Innovatsiialyq Habtyń resmi ashylýy ótti,- dep habarlaidy Dalanews.kz
Is-sharaǵa elimizdiń túkpir-túkpirinen kelgen áleýmettik kásipkerler, tanymal qoǵam qairatkerleri men BAQ ókilderi qatysty.
Hab Astana qalasy ákimdiginiń jáne Qazaqstandaǵy áleýmettik investorlar qaýymdastyǵynyń qoldaýymen ashyldy. Bul – qoǵamdyq qundylyq jasaityn, áleýmettik startap ashqysy keletin, oqyp-úirenip, mentorlyq qoldaý alǵysy keletin jandar úshin tartylys ortalyǵy.
Hab qabyrǵasynda social concept store jumys isteidi – munda áleýmettik kásipkerlerdiń ónimderi usynylǵan. Sondai-aq, barista mektebi men áleýmettik kofehana iske qosylǵan, onda estý qabileti shekteýli jandar bilim alyp, jumysqa ornalasyp jatyr.
Habtyń missiiasy – Qazaqstanda jáne Ortalyq Aziiada áleýmettik kásipkerlikti damytý, inkliýziia, turaqtylyq jáne teń múmkindik ideialaryn ilgeriletý.
Ashylý saltanatynda sóz sóilegen Astana qalasy Kásipkerlikti damytý jáne investitsiialar basqarmasy basshysynyń orynbasary Qýanysh Saparov óz sózinde Qazaqstanda 1317 áleýmettik kásipkerlik sýbektisi tirkelse, onyń 255-i Astanada jumys isteitinin aitty.
«Astana ákimdiginiń qoldaýymen 58 grant berildi. Biyl taǵy 50 grant josparlanǵan. Kásipkerlikti qoldaý qory arqyly 28 kásipkerge jeńildetilgen paiyzben nesie berilse,«Astana SPK» arqyly 19 kásipkerge jeńildikpen jalǵa beriletin oryn usynyldy», - deidi ol.
«Habty qurý ideiasy paida bolǵan sátten bastap búgingi iske qosylýyna deiin 4 jyl ótti. Endi bul «úidiń» esigi tek Qazaqstan úshin emes, búkil Ortalyq Aziia úshin ashyq. Alda úlken josparlar bar. Biz aimaqtaǵy jetekshi kúshke ainalyp, jahandyq qorlar men ortalyqtarmen birge áleýmettik ózgeristerge qol jetkizýdi kózdeimiz», — deidi Social Innovation Hub tóraǵasy Emin Áskerov.
Is-shara aiasynda áleýmettik kásipkerlerge arnalǵan Darhan Jágiparovtyń fotokórmesi, «Jaqsylyq elshisi» premiiasynyń marapattaý rásimi, sondai-aq Emin Áskerovtiń «Áskerov áseri» atty kitabynyń tanystyrylymy ótti.
