استانادا ورتالىق ازياداعى العاشقى الەۋمەتتىك يننوۆاسيالىق حابتىڭ رەسمي اشىلۋى ءوتتى،- دەپ حابارلايدى Dalanews.kz
ءىس-شاراعا ەلىمىزدىڭ تۇكپىر-تۇكپىرىنەن كەلگەن الەۋمەتتىك كاسىپكەرلەر، تانىمال قوعام قايراتكەرلەرى مەن ب ا ق وكىلدەرى قاتىستى.
حاب استانا قالاسى اكىمدىگىنىڭ جانە قازاقستانداعى الەۋمەتتىك ينۆەستورلار قاۋىمداستىعىنىڭ قولداۋىمەن اشىلدى. بۇل – قوعامدىق قۇندىلىق جاسايتىن، الەۋمەتتىك ستارتاپ اشقىسى كەلەتىن، وقىپ-ۇيرەنىپ، مەنتورلىق قولداۋ العىسى كەلەتىن جاندار ءۇشىن تارتىلىس ورتالىعى.
حاب قابىرعاسىندا social concept store جۇمىس ىستەيدى – مۇندا الەۋمەتتىك كاسىپكەرلەردىڭ ونىمدەرى ۇسىنىلعان. سونداي-اق، باريستا مەكتەبى مەن الەۋمەتتىك كوفەحانا ىسكە قوسىلعان، وندا ەستۋ قابىلەتى شەكتەۋلى جاندار ءبىلىم الىپ، جۇمىسقا ورنالاسىپ جاتىر.
حابتىڭ ميسسياسى – قازاقستاندا جانە ورتالىق ازيادا الەۋمەتتىك كاسىپكەرلىكتى دامىتۋ، ينكليۋزيا، تۇراقتىلىق جانە تەڭ مۇمكىندىك يدەيالارىن ىلگەرىلەتۋ.
اشىلۋ سالتاناتىندا ءسوز سويلەگەن استانا قالاسى كاسىپكەرلىكتى دامىتۋ جانە ينۆەستيسيالار باسقارماسى باسشىسىنىڭ ورىنباسارى قۋانىش ساپاروۆ ءوز سوزىندە قازاقستاندا 1317 الەۋمەتتىك كاسىپكەرلىك سۋبەكتىسى تىركەلسە، ونىڭ 255ء-ى استانادا جۇمىس ىستەيتىنىن ايتتى.
«استانا اكىمدىگىنىڭ قولداۋىمەن 58 گرانت بەرىلدى. بيىل تاعى 50 گرانت جوسپارلانعان. كاسىپكەرلىكتى قولداۋ قورى ارقىلى 28 كاسىپكەرگە جەڭىلدەتىلگەن پايىزبەن نەسيە بەرىلسە،«استانا سپك» ارقىلى 19 كاسىپكەرگە جەڭىلدىكپەن جالعا بەرىلەتىن ورىن ۇسىنىلدى»، - دەيدى ول.
«حابتى قۇرۋ يدەياسى پايدا بولعان ساتتەن باستاپ بۇگىنگى ىسكە قوسىلۋىنا دەيىن 4 جىل ءوتتى. ەندى بۇل «ءۇيدىڭ» ەسىگى تەك قازاقستان ءۇشىن ەمەس، بۇكىل ورتالىق ازيا ءۇشىن اشىق. الدا ۇلكەن جوسپارلار بار. ءبىز ايماقتاعى جەتەكشى كۇشكە اينالىپ، جاھاندىق قورلار مەن ورتالىقتارمەن بىرگە الەۋمەتتىك وزگەرىستەرگە قول جەتكىزۋدى كوزدەيمىز»، — دەيدى Social Innovation Hub ءتوراعاسى ەمين اسكەروۆ.
ءىس-شارا اياسىندا الەۋمەتتىك كاسىپكەرلەرگە ارنالعان دارحان جاگىپاروۆتىڭ فوتوكورمەسى، «جاقسىلىق ەلشىسى» پرەمياسىنىڭ ماراپاتتاۋ ءراسىمى، سونداي-اق ەمين اسكەروۆتىڭ «اسكەروۆ اسەرى» اتتى كىتابىنىڭ تانىستىرىلىمى ءوتتى.
