Elordanyń kópsalaly medısına ortalyǵynda onkologıalyq naýqastar úshin sáýlelik terapıaǵa arnalǵan zamanaýı joǵary tehnologıalyq eki qurylǵy iske qosyldy, dep habarlaıdy Dalanews.kz
TrueBeam jelilik údetkishi jáne sońǵy úlgidegi KT sımýlátory onkologıalyq naýqastardyń syrtqy sáýlelik terapıasyna arnalǵan álemdegi eń ozyq joǵary tehnologıalyq qurylǵylardyń biri bolyp sanalady. Tegin medısınalyq kómektiń kepildik berilgen kólemi (TMKKK) aıasynda pasıentterge barlyq emdeý, onyń ishinde dıagnostıka jáne sáýlelik terapıa tegin kórsetiledi.
TrueBeam júıesi saý tinderge az zaqym keltire otyryp, isikterdi barynsha tıimdi nysanaǵa alýǵa múmkindik beredi. Qurylǵy sáýlelenýdi pasıenttiń tynys alýymen sınhrondaýǵa, emdeýdi naqty ýaqyt rejıminde retteýge, seanstardyń sanyn azaıtatyn jáne qalpyna keltirýdi tezdetetin joǵary doza prosedýralaryn oryndaı alady.
Somatom Go.Sim CT sımýlátory topografıany oryndaý jáne sáýlelik terapıaǵa daıyndalý úshin qoldanylady. Ol naýqastyń jeke anatomıalyq erekshelikterin eskere otyryp, emdeý kýrsyn dál josparlaýǵa múmkindik beredi.
Bul quraldyń kómegimen eresekter de, balalar da emdele alady.
Jabdyq «Qazaqstan halqyna» qoǵamdyq qorynyń qaıyrymdylyq jobasy aıasynda ornatyldy.
«Bul elordanyń densaýlyq saqtaý júıesi úshin ǵana emes, búkil el úshin mańyzdy oqıǵa, óıtkeni ol onkologıalyq aýrýlardy sáýlelik terapıanyń eń zamanaýı jáne dál ádisterin qoldaný arqyly emdeýde jańa múmkindikter ashady. Qordyń qoldaýynyń arqasynda pasıentter halyqaralyq standarttarǵa sáıkes keletin joǵary tehnologıalyq medısınalyq kómekke qol jetkizdi. Bul jabdyqtyń iske qosylýy qalanyń damýyndaǵy jáne qyzmet sapasynyń jańa kezeńine aınalatynyna jáne emdelýshiler úshin qoljetimdi bolatynyna senimdimin», - dep atap ótti Astana densaýlyq saqtaý basqarmasynyń basshysy Álıa Rústemova.
Dárigerlerdiń aıtýynsha, bul ádis isikke maksımaldy áser etedi jáne emdeýdiń joǵary múmkindigin qamtamasyz etedi.
«Búgin biz sońǵy býynnyń jelilik údetkishin jáne KT sımýlásıalyq modýlin iske qosyp jatyrmyz. Bul qurylǵylar tipti eń qıyn jerlerde – mı men julynnyń isikterin saý tinderge az zaqym keltire otyryp emdeýge múmkindik beredi. Mundaı tehnologıalar álemniń jetekshi onkologıalyq ortalyqtarynda qoldanylady, qazir olar bizdiń emdelýshiler úshin qoljetimdi. Bul alǵa jasalǵan úlken qadam, emdelýshilerdiń ómir súrý sapasyn, tıimdiligin, emdelý sapasyn jaqsartýǵa múmkindik beredi. Nátıjesinde pasıentterdiń ómir súrý deńgeıi joǵarylaıdy», - dep qosty ortalyq dırektory Muhtar Tóleýtaev.
