Jýyrda áleýmettik jelilerde taksi júrgizýshisine qatysty video tarap ketti. Oqiǵa Astanada bolǵan. Kadrlarda jolaýshy múmkindigi shekteýli taksi júrgizýshisine bylapyt sózder aitqany estiledi.
Júrgizýshini qorlaǵan er adamǵa sot úkimi shyqty, - dep habarlaidy Dalanews.kz.
Astana qalasynyń ákimshilik quqyqbuzýshylyqtar jónindegi mamandandyrylǵan aýdanaralyq soty usaq buzaqylyq jasaý deregi boiynsha júrgizýshini balaǵattaǵan K.-ke qatysty isti qarady.
"K. takside kele jatyp, taksi júrgizýshisiniń ar-namysy men qadir-qasietin qorlap, balaǵat sózder aitqan. Óz is-áreketimen K. qoǵamǵa qurmetsizdik tanytyp, qoǵamdyq tártipti buzdy", - dep jazylǵan málimette.
Sot otyrysy barysynda K. kinásin moiyndap, jasaǵan isine ókingen.
Jábirlenýshi S. sýrdoaýdarmashynyń kómegimen K. telefon qýattaǵysh symdy talap etkenin, sodan keiin ony qorlap, balaǵat sózder aitqanyn jetkizdi. Densaýlyq jaǵdaiyna bailanysty júrgizýshi onyń ádepsiz qylyǵyna jaýap qatpai, tek kólikti toqtatqan.
Bul jait K.-nyń moiyndaýynan bólek, oqiǵa ornynda túsirilgen videomen rastaldy.
Sot qaýlysymen K. Ákimshilik quqyqbuzýshylyq týraly kodekstiń 434-babynyń 1-bóligi boiynsha ákimshilik quqyqbuzýshylyq jasaǵany úshin kináli dep tanylyp, oǵan 15 táýlikke qamaýǵa alý túrinde jaza taǵaiyndaldy.
"Sot 15 táýlik qamaýǵa alý túrindegi jazalaý sharasyn jasalǵan is-árekettiń dárejesi men sipatyn, buryn osyǵan uqsas qoǵamdyq tártipti birneshe ret buzǵanyn eskere otyryp taǵaiyndady. Qaýly zańdy kúshine engen joq", - dep jazylǵan sot málimetinde.
