جۋىردا الەۋمەتتىك جەلىلەردە تاكسي جۇرگىزۋشىسىنە قاتىستى ۆيدەو تاراپ كەتتى. وقيعا استانادا بولعان. كادرلاردا جولاۋشى مۇمكىندىگى شەكتەۋلى تاكسي جۇرگىزۋشىسىنە بىلاپىت سوزدەر ايتقانى ەستىلەدى.

جۇرگىزۋشىنى قورلاعان ەر ادامعا سوت ۇكىمى شىقتى، - دەپ حابارلايدى Dalanews.kz.

استانا قالاسىنىڭ اكىمشىلىك قۇقىقبۇزۋشىلىقتار جونىندەگى مامانداندىرىلعان اۋدانارالىق سوتى ۇساق بۇزاقىلىق جاساۋ دەرەگى بويىنشا جۇرگىزۋشىنى بالاعاتتاعان ك.-كە قاتىستى ءىستى قارادى.

"ك. تاكسيدە كەلە جاتىپ، تاكسي جۇرگىزۋشىسىنىڭ ار-نامىسى مەن قادىر-قاسيەتىن قورلاپ، بالاعات سوزدەر ايتقان. ءوز ىس-ارەكەتىمەن ك. قوعامعا قۇرمەتسىزدىك تانىتىپ، قوعامدىق ءتارتىپتى بۇزدى"، - دەپ جازىلعان مالىمەتتە.

سوت وتىرىسى بارىسىندا ك. كىناسىن مويىنداپ، جاساعان ىسىنە وكىنگەن.

جابىرلەنۋشى س. سۋردواۋدارماشىنىڭ كومەگىمەن ك. تەلەفون قۋاتتاعىش سىمدى تالاپ ەتكەنىن، سودان كەيىن ونى قورلاپ، بالاعات سوزدەر ايتقانىن جەتكىزدى. دەنساۋلىق جاعدايىنا بايلانىستى جۇرگىزۋشى ونىڭ ادەپسىز قىلىعىنا جاۋاپ قاتپاي، تەك كولىكتى توقتاتقان.

بۇل جايت ك.-نىڭ مويىنداۋىنان بولەك، وقيعا ورنىندا تۇسىرىلگەن ۆيدەومەن راستالدى.

سوت قاۋلىسىمەن ك. اكىمشىلىك قۇقىقبۇزۋشىلىق تۋرالى كودەكستىڭ 434-بابىنىڭ 1-بولىگى بويىنشا اكىمشىلىك قۇقىقبۇزۋشىلىق جاساعانى ءۇشىن كىنالى دەپ تانىلىپ، وعان 15 تاۋلىككە قاماۋعا الۋ تۇرىندە جازا تاعايىندالدى.

"سوت 15 تاۋلىك قاماۋعا الۋ تۇرىندەگى جازالاۋ شاراسىن جاسالعان ىس-ارەكەتتىڭ دارەجەسى مەن سيپاتىن، بۇرىن وسىعان ۇقساس قوعامدىق ءتارتىپتى بىرنەشە رەت بۇزعانىن ەسكەرە وتىرىپ تاعايىندادى. قاۋلى زاڭدى كۇشىنە ەنگەن جوق"، - دەپ جازىلعان سوت مالىمەتىندە.