Elorda ákimdiginde merzimdi áskeri qyzmetin aiaqtaǵan jas astanalyqtarǵa memlekettik bilim granttaryn tabystaý rásimi ótti,- dep habarlaidy Dalanews.kz
Grant iegerleri – UQK Shekara qyzmetiniń qatarynda áskeri boryshyn ótep, shekara zastavalarynda tikelei memlekettik shekarany qorǵaǵan bes astanalyq jas.
JOO-ǵa qabyldaýǵa arnalǵan sertifikattardy olarǵa Astana qalasy ákiminiń orynbasary Erik Meiirhan tabystady. Ol jastardy ómirlerindegi jańa kezeńniń bastalýymen quttyqtap, olardyń jasaǵan tańdaýynyń mańyzdylyǵyn atap ótti.
«Sizderdiń tańdaýlaryńyz elimizdegi jetekshi joǵary oqý oryndarynyń biri – L.N. Gýmilev atyndaǵy Eýraziia ulttyq ýniversitetine túsý boldy. Bul – óte quptarlyq qadam», – dedi ol.
Ákim orynbasary sondai-aq qalanyń qoldaýy jastardyń maqsattaryna jetýine sep bolatynyna senim bildirdi.
«Qala atynan sizderdi qoldaýdy jón kórip, grant tabystap otyrmyz. Bul – sizderdiń qyzmetterińizge degen qurmettiń, sondai-aq alǵan bilimderińizdi qoǵam men memleket igiligine jumsaityndaryńyzǵa degen senimniń belgisi.
Sizderge oqýda tabys jáne shabyt tileimin. Stýdenttik ómirlerińiz Otan úshin erekshe jańalyqtar men úlken jetistikter kezeńine ainalsyn», – dedi Erik Meiirhan.
Áskeri boryshyn ótep kelgen jastarǵa bilim grantyn berý jobasy 2023 jyly iske qosyldy. Bul – respýblikada alǵash ret qolǵa alynǵan, áleýmettik belsendi, tártipti ári jaýapty sarbazdardy qoldaýǵa baǵyttalǵan konkýrs. Joba Qorǵanys ministrligi, Ǵylym jáne joǵary bilim ministrligi jáne eldiń jetekshi joǵary oqý oryndary arasyndaǵy kelisimder negizinde júzege asyrylyp jatyr.
Grant iegerleri – azamattyq boryshyn atqaryp qana qoimai, tártip pen jaýapkershilik tanytyp, ózin-ózi damytýǵa umtylǵan jastar.
Grant iegerleriniń biri - Qanat Rysbek Almaty oblysynda áskeri qyzmette bolǵanyn jáne oqý úshin «fizika» mamandyǵyn tańdaǵanyn aitty.
UQK Shekara qyzmetinde áskeri boryshyn adal oryndaǵan ol óz áserimen bólisti.
«Alǵashqy eki aidan keiin bizden ýniversitette oqýdy jalǵastyrǵysy keletinderdi jinai bastady. Ár apta saiyn túrli kriterii boiynsha baǵalady – dene daiyndyǵy, tártip, úlgerim. Bizge daiyndalýǵa ýaqyt bóldi, tipti onlain sabaqtarǵa telefondar da berdi. Emtihan onlain formatta ótti – fizika men matematikadan tapsyrdym, árqaisysynan 40 suraqtan boldy. Áskerden keiin ýniversitetke túsý múmkindigi berilgenine óte rizamyn – bul ári qarai oqýǵa jáne damýǵa úlken motivatsiia», – dedi ol.
Taǵy bir grant iegeri – Jambyl oblysy Qordai aýdanynda áskeri qyzmet atqarǵan Bijan Shenzah «sáýlet» mamandyǵyn tańdady.
«Bastapqyda-aq bizden áskerden keiin ýniversitetke túskisi keletinder jaily surady. Postqa bólingennen keiin aldaǵy testileý týraly habarlady, biz daiyndyqty bastadyq. Munda tek test nátijeleri ǵana emes, áskeri qyzmettegi jalpy daiyndyq – tártip, fizikalyq forma, atys, normativter de eskerildi. Munyń bári qorytyndy balǵa áser etti. Irikteýden ótip, bilim sertifikatyn alǵanyma qýanyshtymyn. Bul – úlken qoldaý», – dedi ol.
