Aýa raıynyń jylynýymen elordada joldardy jóndeý jáne salý jumystary bastaldy. Bıyl qalanyń jol ınfraqurylymyn jaqsartý baǵdarlamasy aıasynda 60-tan astam kóshede ortasha jóndeý jumystaryn júrgizý josparlanyp otyr, dep habarlaıdy Dalanews.kz

Jumystar jol tóseminiń sapasyn qalpyna keltirý men jaqsartýǵa ǵana emes, sonymen qatar jol qozǵalysy qaýipsizdigi men turǵyndardyń emin-erkin júrýin arttyrýǵa baǵyttalǵan.

10 sáýirden bastap myna kóshelerde jóndeý jumystary bastalady:

• Alash tas jolynyń boıy, 69 kósheden 191 kóshege deıin;
• Qorǵaljyn tas jolynyń boıy, Turan dańǵylynan 128 kóshege deıin;
• Syǵanaq kóshesi Qabanbaı batyr dańǵylynan kólik aıryǵyna deıin (ótken jyly jumystar Sh. Aıtmatov kóshesinen Qabanbaı batyr dańǵylyna deıingi ýchaskede júrgizilgen);
• turǵyn alaptarda – Jańaqonys, Qartaly, Faht ben Abdýl Azız, Gersen, Sh.Bókeev jáne t.b.

Jóndeýdiń negizgi kezeńderiniń biri - shuńqyrly tustar men marshrýttyq joldar. Ol jabynnyń zaqymdanýyn túzetýdi, jol jaǵdaıyn jaqsartýdy jáne avtokólik júrgizýshileri men jaıaý júrginshiler úshin qozǵalys yńǵaılylyǵyn qamtamasyz etedi. Bul baǵyttaǵy jumystar belsendi júrgizilýde.

Sondaı-aq, josparlanǵan jumystardyń qatarynda jańa trotýarlardy, aıaldama burylystaryn, pandýstardy salý máselesi bar. Jol belgileri de jańartylady. «Balalar qaýipsizdigi» sıaqty qaýipsizdik baǵdarlamalaryna erekshe nazar aýdarylatyn bolady, onyń aıasynda balalar mekemeleri men mektepterdiń janynda ornalasqan ýchaskelerde balalar men ata-analardyń qaýipsiz qozǵalysyn qamtamasyz etetin belgiler ornatylady.

Budan basqa, bıyl elordada uzyndyǵy 14,7 km bolatyn 43 nysannyń qurylysy josparlanyp otyr, segiz joba boıynsha jumys tolyq aıaqtalady, 28 joba boıynsha jalǵasady, taǵy jeteýi jańadan bastalady, onyń ishinde:

• Q.Qaısenov kóshesi Buqar jyraý kóshesinen Uly Dala dańǵylyna deıin;
• Buqar jyraý kóshesi Ál-Farabı dańǵylynan Joshy han kóshesine deıin;
• Rysqulov kóshesi Máńgilik El dańǵylynan Nura-Esil kanalyna deıin jáne t.b.

Sondaı-aq, N.Tilendıev dańǵyly men Sh.Beısekov kóshesiniń qıylysynda eki deńgeıli kólik aıryǵyn salý jobasyn júzege asyrylyp jatyr.

Jyl sońyna deıin jol júrýdi qamtamasyz ete otyryp, Q.Muhamedhanov kóshesin salý jobasy iske asyrylýda, bul Aıtmatov pen Qorǵaljyn tas jolynyń qıylysyndaǵy kólik aǵynyn azaıtady.

Jóndeý jumysyna baılanysty jabylatyn árbir ýchaske boıynsha resmı derekkózderde aldyn ala habarlanatyn bolady.