«Astana onlain» áleýmettik jobasy aiasynda «Memleket basshysynyń Qazaqstan halqyna Joldaýyn iske asyrý: Qurylys kodeksi – qurylys sapasyn arttyrýdyń zańnamalyq negizi» taqyrybynda aqparattyq pikirtalas baǵdarlamasy ótti, dep habarlaidy Dalanews.kz.
Baǵdarlamaǵa joba jetekshisi, «Ulttyq qundylyqtar akademiiasy» respýblikalyq qoǵamdyq birlestiginiń tóraǵasy Ádilhan Dúisebek, májilis depýtaty, Ekonomikalyq reforma jáne óńirlik damý komitetiniń múshesi Murat Ábenov, májilis depýtaty, Zańnama jáne sot-quqyqtyq reforma komitetiniń múshesi Baqytjan Bazarbek, Ónerkásip jáne qurylys ministrliginiń departament direktory Rýslan Lepesov, «QazQSǴZI» AQ bas direktory Begman Kúlbaev jáne Astana qalalyq Ishki saiasat basqarmasynyń basshysy Nurdáýlet Álmuhanov qatysty.
Is-sharada qurylys salasyndaǵy ózekti máseleler men zańnamalyq retteý tetikteri talqylandy.
Atap aitqanda, «Qurylys kodeksi – qurylys sapasyna pármendi baqylaý ornatýdyń zańnamalyq negizi», «Qurylys salasyndaǵy túitkildi máseleler jáne zańnamalyq tetikterdi jetildirý», «Qurylysty josparlaýdyń jáne oǵan monitoring júrgizýdiń ulttyq tsifrlyq platformasy», «QR jańa Qala qurylysy kodeksiniń qurylym jobasyn ázirleý barysy» taqyryptarynda pikirtalas ótti.
Rýslan Lepesovtyń aitýynsha, 2022 jyly Prezidenttiń tapsyrmasymen Jańa qurylys kodeksin ázirleý jumystary bastalǵan. Búginde májiliste qaralyp jatqan sol kodeks jyl sońynda qabyldanady.
"Jańa qurylys kodeksinde burynǵy zańdaǵydai emes adamnyń qaýipsizdigi men jaily jaǵdaiy aldyńǵy orynǵa qoiylǵan. Qurylysqa qatysty halyqtyń jan-aiqaiy, usynystary men syn-eskertpeleri negizge alynǵan. Qurylys sapasyna taǵylǵan syn boiynsha máselelerdi sheshý mehanizmderi qarastyrylǵan", – dedi Baqytjan Bazarbek.
Baǵdarlamaǵa qatysqan elorda turǵyndary spikerlerge qaladaǵy qurylystarǵa qatysty ózekti máselelerdi, ózderi turatyn úidiń qiyndyqtaryna bailanysty jeke suraqtaryn qoiyp, zań aiasynda ony qalai sheshýge bolatyny týraly jaýap aldy.
