Astanada jańa órt bólimi iske qosyldy. Bul týraly qala ákimi Jeńis Qasymbek Instagram paraqshasynda jazdy,- dep habarlaidy Dalanews.kz
Jańa bólim elordadaǵy 36 myńnan astam turǵyny bar qarqyndy damyp kele jatqan Úrker eldi mekeninde ornalasqan. Buǵan deiin eń jaqyn órt bólimi 15 shaqyrym qashyqtyqta bolǵan.
«Jańa órt bólimi tótenshe jaǵdai oryndaryna jyldam jetýge aitarlyqtai múmkindik beredi. QR Tótenshe jaǵdailar ministri Shyńǵys Arynovpen birge deponyń jabdyqtalýymen tanystyq. Órt bólimi zamanaýi tehnikamen tolyq qamtylǵan: avtotsisternalar, jedel áreket etý kólikteri bar. Qyzmetkerler úshin jumys isteýge yńǵaily jaǵdai jasalǵan», – dep jazdy qala ákimi.
Ákimniń aitýynsha, ótken jyly elordada eki órt deposy ashylǵan. Sońǵy eki jylda qalalyq TJD avtoparki 40-tan astam jańa tehnikamen tolyqqan, olardyń qatarynda zamanaýi ushatyn drondar da bar. Qazirgi ýaqytta taǵy úsh órt bóliminde kúrdeli jóndeý jumystary júrgizilýde.
Budan bólek, azamattyq qorǵaý qyzmetkerlerin áleýmettik qoldaý sharalary jalǵasýda. Ótken jyly olarǵa 50 páter berilse, biyl taǵy 15 qyzmettik páter tabystalmaq.
Qala basshysy azamattyq qorǵaý júiesin odan ári kúsheitý jumystary jalǵasatynyn atap ótti.
