Astana Hub alańynda Google for Developers uiymdastyrǵan Firebase Studio Championship finaly ótti. Bul is-sharaǵa 100-den astam ázirleýshi, startaper jáne IT salasynyń sarapshylary qatysty. Chempionattyń negizgi maqsaty – Ortalyq Aziianyń jańa býyn ázirleýshileriniń daǵdylaryn damytý jáne Firebase Studio men Gemini API siiaqty jańa tehnologiialardy keńinen nasihattaý,- dep habarlaidy Dalanews.kz
Is-sharanyń mańyzdy bóliginiń biri Google zertteý jónindegi direktory ári jasandy intellekt salasyndaǵy álemdik deńgeidegi maman Piter Norvigpen kezdesý boldy. «Jasandy intellekt: qazirgi zaman tásilderi» atty oqýlyqtyń, JI boiynsha tanymal onlain-kýrstyń avtory jáne Google izdeý algoritmderin ázirleý jumysyn basqarǵan Norvig, jasandy intellekttiń bolashaǵy, Google-diń osy saladaǵy róli jáne JI tehnologiiasynyń startap ekosistemasyna áseri jaily ashyq áńgime ótkizdi.
Sharanyń basty bóligi Firebase Studio chempionatynyń finaly boldy. Oǵan Ortalyq Aziianyń eń úzdik 10 komandasy Firebase Studio jáne Gemini API quraldaryn paidalana otyryp jasalǵan jobalaryn usyndy. Jobalardyń arasynda LangBridge (Aktóbe) – qazaq tilin úiretetin JI negizindegi oqytýshy, Emgek AI (Bishkek) – migranttar úshin jumys izdeý platformasy, TerraVibe (Ashhabad) – balalarǵa ósimdiktermen sóilesýge múmkindik beretin JI, Fleetly (Astana) – avtoparkti basqarý jáne dispetcherlik júie, Ebitdaddy (Astana) – qarjy salasyndaǵy suhbattarǵa daiyndalýǵa kómektesetin júie, Loom (Pavlodar) – balalar sýretterin emotsiia tiline ainaldyratyn joba, Civisignal (Astana) – qalalyq máselelerdi sheshýge arnalǵan platforma, QuizPet (Astana) – virtýaldy úi janýary arqyly jańa materialdy úirený júiesi, PrepAi (Qyzylorda) – IELTS jáne SAT testilerine daiyndyq, IdeaForge (Astana) – JI kómegimen kreativti oilaý protsesin jeńildetetin platformasy bar.
Chempionattyń jeńimpazy atanǵan Astananyń EbitDaddy komandasy $500 jáne $1000 kólemindegi Google Cloud Platform vaýcherin jeńip aldy. Olar ázirlegen ónim – stýdentter men túlekterge suhbattarǵa daiyndalýǵa, al rekrýterlerge kandidattardy aldyn ala skriningten ótkizýge kómektesetin JI platformasy. Bul sheshim 1500-den astam naqty suraqtan turatyn baza men intellektýaldy keri bailanysqa negizdelgen, bul úmitkerlerdiń senimdiligin arttyryp, praktikalyq daǵdylaryn damytady.
«Chempionattaǵy jeńis biz úshin – durys baǵytta kele jatqanymyzdyń aiǵaǵy ári ónimdi ári qarai damytyp, Qazaqstannyń IT indýstriiasyn ilgeriletý úshin kúshti yntalandyrý. Biz Google-ge bizdiń ázirleýshilerimizge bolashaqty qurýǵa múmkindik beretin qyzmetteri úshin, sondai-aq Astana Hub pen alem.ai-ǵa ekosistema men jas komandalardy qoldaǵany úshin erekshe alǵys aitamyz. Chempionatqa qatysý bizge sarapshylardan mańyzdy keri bailanys alyp, ideianyń ómirsheńdigin rastaýǵa jáne kásibi bailanystarymyzdy keńeitýge kómektesti. Qazirgi tańda biz negizgi ónimimiz – virtýaldy taǵylymdama úshin EdTech platformasy «Interniýmdy» damytyp jatyrmyz jáne pilottyq baǵdarlamalardy iske qosý úshin ýniversitetter men seriktes kompaniialardy izdestirip jatyrmyz», – dedi EbitDaddy kompaniiasynyń bas direktory ári negizin qalaýshysy Daniiar Rahimberdinov.
Ekinshi orynǵa TerraVibe komandasy ie bolyp, $400 men $700 kóleminde vaýcher aldy. Úshinshi oryndy Emgek AI komandasy ielenip, $300 men $500-lik vaýchermen marapattaldy. Tórtinshi jáne besinshi oryndardy IdeaForge jáne Loom komandalary ielendi, olardyń árqaisysy $200 aldy. Barlyq finalister Cloudskillsboost bilim berý resýrstaryna qoljetimdilik pen estelik sertifikattarmen marapattaldy.
Chempionattyń qazylar alqasynda sala mamandary men tehnologiialyq qoǵamdastyq ókilderi boldy. Olardyń arasynda Google zertteý direktory Piter Norvig, Codiplay bas direktory Danabek Kaliajdarov, ForestHero kompaniiasynyń Chief AI Officer-i Madina Abdrahmanova, YourPerfectSWE negizin qalaýshy Dalida Erkýlieva, outpeer.kz platformasynyń bas direktory Jazira Koppagambetova, Qaz.ai Assotsiatsiiasynyń vitse-prezidenti Anar Taýbaeva jáne Google for Developers úilestirýshisi Askar Aitýov bar.
Aita keteiik, chempionat AI Week aiasynda ótti, ol óz kezeginde Digital Bridge 2025 halyqaralyq forýmy aiasynda uiymdastyryldy. Apta boiy elordada konkýrstar, chempionattar, álemdik sarapshylarmen kezdesýler jáne innovatsiialyq jobalardyń tanystyrylymdary ótedi. AI Week mektep oqýshylaryn, stýdentterdi, startaptardy, korporatsiialardy jáne halyqaralyq kompaniialardy biriktirip, tájiribe almasýǵa jáne Ortalyq Aziiadaǵy JI ekosistemasyn damytýǵa múmkindik beredi.
