Astananyń Nura aýdanynda jalpy aýmaǵy 738 sharshy metr bolatyn erekshe qajettilikteri bar balalarǵa arnalǵan jańa inkliýzivti oiyn alańy ashyldy, dep habarlaidy Dalanews.kz.
Alań kórý qabileti nashar, qozǵalysy shekteýli jáne tirek-qimyl apparaty buzylǵan balalardyń qajettilikterine sai beiimdelip, olardyń erkin oinap, bilim alyp, damýyna barlyq múmkindik qarastyrylǵan. Munda oiyn, sport jáne tanymdyq aimaqtar biriktirilip, ár balaǵa teń qoljetimdi orta jasalǵan.
Qoljetimdilikti qamtamasyz etý úshin taktildi plitkalar men baǵyttaýshy jolaqtar, ártúrli jabyndardan quralǵan sezimder jolaǵy (shaǵal tas, kógal, qum, bolat, jumsaq jabyn), Brail qarpimen jazylǵan aqparattyq taqtaishalar (álipbi, alań syzbasy, baǵdarlar), keń joldar men yńǵaily navigatsiia ornatylǵan.
Demalys jáne tanym aimaqtaryna shatyr astyndaǵy shaǵyn kitaphana, qol tireýishi bar oryndyqtar men omyrtqa aýrýyna beiim balalarǵa arnalǵan arnaiy oryndyqtar, shatyr astyndaǵy as ústelderi, velosiped pen arbalarǵa arnalǵan turaq kiredi oiyn jáne sport alańdarynda batýttar men átkenshekter (onyń ishinde uia-átkenshek), keme pishinindegi inkliýzivti oiyn kesheni, vorkaýt aimaǵy jáne arbamen oinaýǵa yńǵaily kóterińki qumsalǵysh qarastyrylǵan.
Sondai-aq balalar úshin arnaiy jasalǵan interaktivti mini-qalashyqta órt sóndirý beketi, jedel járdem, politsiia, qonaqúi, STO, meiramhana syndy ǵimarattar men baǵdarshamdar, jaiaý júrginshiler ótkelderi, jol belgileri sekildi infraqurylym elementteri bar.
«Bizdiń mindetimiz – árbir otbasynyń ózin qoǵamnyń nazarynda, qamqorlyqta sezinýi inkliýzivti oiyn alańy – balalardyń esh kedergisiz birge oinap, birge damýyna jol ashatyn mańyzdy bastama», – dedi alańnyń ashylý satanatynda sóz sóilegen aýdan ákimi Rishat Turdybekov.
