Cardiff University Astanada óz filialyn ashty. Bul – ýniversitettiń sheteldegi alǵashqy kampýsy ári Ortalyq Aziiadaǵy Russell Group ókilderiniń ishindegi jalǵyz joǵary oqý orny. Saltanatty shara halyqaralyq bilim berý salasyndaǵy mańyzdy qadam ári Qazaqstan, Ulybritaniia jáne Ýels arasyndaǵy strategiialyq seriktestikti nyǵaitýdyń belgisi boldy,- dep habarlaidy Dalanews.kz
Ashylý rásimine QR Ǵylym jáne joǵary bilim ministri Saiasat Nurbek, Ulybritaniianyń Qazaqstandaǵy elshisi Salli Aksvorti hanym, Cardiff University prezidenti ári vitse-kantsleri professor Vendi Larner, sondai-aq ýniversitet ókilderi men seriktes uiymdar qatysty.
Cardiff University prezidenti Vendi Larner bul oqiǵanyń mańyzdylyǵyn atap ótti.
– Qazaqstandaǵy Cardiff University kampýsy – bizdiń alǵashqy halyqaralyq filialymyz. Osy aida-aq akademiialyq turǵydan myqty stýdentterdiń alǵashqy legin qabyldaýdy asyǵa kútemiz. Biz Russell Group quramyndaǵy alǵashqy ýniversitet retinde Qazaqstanda kampýs ashtyq. Bul – jahandyq maqsattarymyzdy júzege asyrýdaǵy mańyzdy qadam, – dedi ol.
Cardiff University Kazakhstan direktorlar keńesiniń tóraiymy, ýniversitettiń bas operatsiialyq direktory Pola Sanderson da pikir bildirdi.
– Transulttyq bilim berý salasyn zertteýshi retinde Saiasat Nurbektiń Qazaqstanda júzege asyrǵan osyndai aýqymdy ári keshendi strategiiasyn sirek kezdestirdim. Bul eldi tek óńirlik qana emes, halyqaralyq bilim haby retinde tanytady, – dedi ol.
Ulybritaniianyń Qazaqstandaǵy elshisi Salli Aksvorti jańa kampýstyń ashylýyn eki el arasyndaǵy yntymaqtastyqtyń jańa paraǵy dep baǵalady.
– Cardiff University kampýsynyń ashylýy qazaqstandyq stýdentterge álemdik deńgeidegi akademiialyq tájiribege jol ashady, – dedi ol.
Cardiff University – Ulybritaniiadaǵy jetekshi zertteý ýniversitetteriniń biri, Russell Group múshesi. JOO QS World University Rankings 2026 tiziminde 181-orynda, al Complete University Guide 2026 reitinginde 22-orynda tur.
2025 jylǵy qyrkúiekten bastap Astanadaǵy kampýsta stýdentter kompiýterlik ǵylymdar, biznes-menedjment, azamattyq qurylys jáne geologiia salalary boiynsha aǵylshyn tilinde bilim alady. Sabaqtardy Cardiff University men Cardiff University Kazakhstan oqytýshylary júrgizedi.
Ashylý saltanatynda qonaqtar qazaq jáne vallii táttilerin tatyp kórip, dástúrli vallii arfasynyń úni men eki el mádenietin toǵystyrǵan óner baǵdarlamasynan áser aldy.
