Bıyl Astanada buryn-sońdy bolmaǵan erekshe gastrofestıval ótedi. Festıvál aıasynda eń úzdik qymyz óndirýshiler synǵa túsedi. Al jalpy júlde qory – 45 mıllıon teńge, dep habarlaıdy Dalanews.kz
Bıyl Astanada alǵash ret qazaqtyń asyl sýsyny qymyzǵa arnalyp, «BaiQymyz – baptalǵan qymyz ulttyq taǵamdar gastrofestıvali» atty iri kólemdegi mádenı-agrarlyq is-sharanyń ótýi josparlanyp otyr. Atalǵan festıvál halqymyzdyń dástúrli taǵam mádenıetin, sonyń ishinde qymyz óndirý dástúrin jańǵyrtý men halyqaralyq deńgeıge damytýǵa baǵyttalǵan.
Sharaǵa 60 myńǵa tarta adam qatysady dep josparlanyp otyr. Ár óńirden 50-ge jýyq qymyz óndirýshi qatysady. Uıymdastyrýshylar bul festıváldi «Oktoberfest» sıaqty halyqaralyq úlgidegi mádenı-agrarlyq brendke aınaldyrýdy kózdep otyr. Kelgen qonaqtar eki kún boıy qymyzdyń túr-túrinen dám tatyp, jylqy tuqymdary tanystyrylatyn kórmeni tamashalap, etno-mádenı baǵdarlamalarǵa qatysa alady.
Festıváldiń erekshe júldesi – «Eń úzdik qymyz» ataǵy úshin jarys bolmaq. Baıqaý jeńimpazdary qomaqty qarjyǵa ıe bolady, júlde qory – 45 mıllıon teńge (I oryn – 20 mln tg, II oryn – 15 mln tg, III oryn – 10 mln tg). Baıqaýdyń maqsaty – elimizdegi eń sapaly ári shıpaly qymyzdy anyqtaý. Negizgi maqsat – qymyzdy densaýlyq pen qonaqjaılyqtyń sımvoly retinde tanytý, sonymen qatar agrotýrızm men jylqy sharýashylyǵyn damytýǵa serpin berý.
Jylqy kórmesinde qazaqtyń baıyrǵy tuqymdary – Jaby, Kóshim, Qostanaı, Muǵaljar, Adaı jáne sporttyq baǵyttaǵy attar kópshilik nazaryna usynylady. Qolóner sheberleri er-toqym, qamshy, at ábzelderi sıaqty tarıhı buıymdaryn kórsetip, kelýshiler olardy satyp ala alady. Kórmeniń basty ereksheligi – biregeı buıymdar men jylqylarǵa arnalǵan aýksıon.
Festıvál aıasynda uıymdastyrylatyn ǵylymı konferensıada qymyzdyń emdik qasıetteri, jylqy sharýashylyǵy men dástúrli mal sharýashylyǵynyń damý bolashaǵy talqylanady. Germanıa, Reseı, Qyrǵyzstan elderinen kelgen ǵalymdar, dárigerler, veterınarlar men kásipkerler óz baıandamalaryn usynady.
Qatysýshylar arasynda germanıalyq jylqy sharýashylyǵynyń mamany Hans Solman, medısına ǵylymdarynyń doktory Baqytjan Beıimbetov, etnograf Aıgerim Musaǵajınova jáne basqa da sarapshylar bar.
Sheberlik sabaqtar barysynda qatysýshylarǵa qymyz daıyndaý, saqtaý, ashytý, sondaı-aq ony kapsýla túrinde óndirýdiń zamanaýı ádisteri tanystyrylady. Sonymen qatar, teri ıleý, at ábzelderi men turmystyq buıymdardy jasaý boıynsha da qolóner sheberleri óz bilgenin úıretedi.
Sondaı-aq, baǵdarlama sheńberinde aýdaryspaq, asaý úıretý, qumaı tazy saıysy, shalma salý syndy ulttyq sport túrlerinen jarystar ótkiziledi. Meshkeıler saıysy men jilik syndyrý sekildi erekshe sharalar festıvál kórigin qyzdyrmaq.
