بيىل استانادا بۇرىن-سوڭدى بولماعان ەرەكشە گاستروفەستيۆال وتەدى. فەستيۆال اياسىندا ەڭ ۇزدىك قىمىز وندىرۋشىلەر سىنعا تۇسەدى. ال جالپى جۇلدە قورى – 45 ميلليون تەڭگە، دەپ حابارلايدى Dalanews.kz
بيىل استانادا العاش رەت قازاقتىڭ اسىل سۋسىنى قىمىزعا ارنالىپ، «BaiQymyz – باپتالعان قىمىز ۇلتتىق تاعامدار گاستروفەستيۆالى» اتتى ءىرى كولەمدەگى مادەني-اگرارلىق ءىس-شارانىڭ ءوتۋى جوسپارلانىپ وتىر. اتالعان فەستيۆال حالقىمىزدىڭ ءداستۇرلى تاعام مادەنيەتىن، سونىڭ ىشىندە قىمىز ءوندىرۋ ءداستۇرىن جاڭعىرتۋ مەن حالىقارالىق دەڭگەيگە دامىتۋعا باعىتتالعان.
شاراعا 60 مىڭعا تارتا ادام قاتىسادى دەپ جوسپارلانىپ وتىر. ءار وڭىردەن 50-گە جۋىق قىمىز ءوندىرۋشى قاتىسادى. ۇيىمداستىرۋشىلار بۇل فەستيۆالدى «وكتوبەرفەست» سياقتى حالىقارالىق ۇلگىدەگى مادەني-اگرارلىق برەندكە اينالدىرۋدى كوزدەپ وتىر. كەلگەن قوناقتار ەكى كۇن بويى قىمىزدىڭ تۇر-تۇرىنەن ءدام تاتىپ، جىلقى تۇقىمدارى تانىستىرىلاتىن كورمەنى تاماشالاپ، ەتنو-مادەني باعدارلامالارعا قاتىسا الادى.
فەستيۆالدىڭ ەرەكشە جۇلدەسى – «ەڭ ۇزدىك قىمىز» اتاعى ءۇشىن جارىس بولماق. بايقاۋ جەڭىمپازدارى قوماقتى قارجىعا يە بولادى، جۇلدە قورى – 45 ميلليون تەڭگە (I ورىن – 20 ملن تگ، II ورىن – 15 ملن تگ، III ورىن – 10 ملن تگ). بايقاۋدىڭ ماقساتى – ەلىمىزدەگى ەڭ ساپالى ءارى شيپالى قىمىزدى انىقتاۋ. نەگىزگى ماقسات – قىمىزدى دەنساۋلىق پەن قوناقجايلىقتىڭ سيمۆولى رەتىندە تانىتۋ، سونىمەن قاتار اگروتۋريزم مەن جىلقى شارۋاشىلىعىن دامىتۋعا سەرپىن بەرۋ.
جىلقى كورمەسىندە قازاقتىڭ بايىرعى تۇقىمدارى – جابى، كوشىم، قوستاناي، مۇعالجار، اداي جانە سپورتتىق باعىتتاعى اتتار كوپشىلىك نازارىنا ۇسىنىلادى. قولونەر شەبەرلەرى ەر-توقىم، قامشى، ات ابزەلدەرى سياقتى تاريحي بۇيىمدارىن كورسەتىپ، كەلۋشىلەر ولاردى ساتىپ الا الادى. كورمەنىڭ باستى ەرەكشەلىگى – بىرەگەي بۇيىمدار مەن جىلقىلارعا ارنالعان اۋكسيون.
فەستيۆال اياسىندا ۇيىمداستىرىلاتىن عىلىمي كونفەرەنسيادا قىمىزدىڭ ەمدىك قاسيەتتەرى، جىلقى شارۋاشىلىعى مەن ءداستۇرلى مال شارۋاشىلىعىنىڭ دامۋ بولاشاعى تالقىلانادى. گەرمانيا، رەسەي، قىرعىزستان ەلدەرىنەن كەلگەن عالىمدار، دارىگەرلەر، ۆەتەرينارلار مەن كاسىپكەرلەر ءوز باياندامالارىن ۇسىنادى.
قاتىسۋشىلار اراسىندا گەرمانيالىق جىلقى شارۋاشىلىعىنىڭ مامانى حانس سولمان، مەديسينا عىلىمدارىنىڭ دوكتورى باقىتجان بەيىمبەتوۆ، ەتنوگراف ايگەرىم مۇساعاجينوۆا جانە باسقا دا ساراپشىلار بار.
شەبەرلىك ساباقتار بارىسىندا قاتىسۋشىلارعا قىمىز دايىنداۋ، ساقتاۋ، اشىتۋ، سونداي-اق ونى كاپسۋلا تۇرىندە ءوندىرۋدىڭ زاماناۋي ادىستەرى تانىستىرىلادى. سونىمەن قاتار، تەرى يلەۋ، ات ابزەلدەرى مەن تۇرمىستىق بۇيىمداردى جاساۋ بويىنشا دا قولونەر شەبەرلەرى ءوز بىلگەنىن ۇيرەتەدى.
سونداي-اق، باعدارلاما شەڭبەرىندە اۋدارىسپاق، اساۋ ۇيرەتۋ، قۇماي تازى سايىسى، شالما سالۋ سىندى ۇلتتىق سپورت تۇرلەرىنەن جارىستار وتكىزىلەدى. مەشكەيلەر سايىسى مەن جىلىك سىندىرۋ سەكىلدى ەرەكشە شارالار فەستيۆال كورىگىن قىزدىرماق.
