Astana qalasy aýmaǵynda aýdandyq ákimdikter men quqyq qorǵaý organdarynyń reıdtik is-sharalary barysynda taǵy 5 tonna nasybaı tárkilendi. Bul ónimniń jalpy quny 25 mıllıon teńgeden asady. Tárkilengen barlyq ónim joıyldy,- dep habarlaıdy Dalanews.kz

Nasybaıdy joıý aksıasy «Zań jáne tártip» qaǵıdaty men «Taza Qazaqstan. Astana – tazalyq pen tártiptiń úlgisi» keń aýqymdy ekologıalyq aksıasy aıasynda ótkizildi.

İs-sharany Astana qalasynyń ákimdigi men qalalyq Polısıa departamenti «AMANAT» partıasy janyndaǵy «Jastar Rýhy» jastar qanatynyń belsendileri jáne jeke áriptes – «Kazecotech» ǴTK JSHS jáne Eýropa-Azıa «Jasyl ekonomıka» qaýymdastyǵy zańdy tulǵalar birlestiginiń qoldaýymen uıymdastyrdy.

Nasybaıdy joıý aksıasy óndiristik baza aýmaǵynda ótti. Ol medısınalyq qaldyqtardy ýtılızasıalaýǵa arnalǵan arnaıy qondyrǵyda joıyldy. Bul – Qazaqstanda «jasyl» tehnologıalar men jabdyqtar tizilimine engizilgen jalǵyz qondyrǵy. Ol «Jasyl tehnologıalar jáne ınvestısıalyq jobalardyń halyqaralyq ortalyǵy» KEAQ tiziliminde bar. Osyǵan oraı, nasybaı sekildi shegilmeıtin qospalardy termıalyq jolmen joıý qorshaǵan ortaǵa zıan keltirmeıdi. Prosesti arnaıy komısıa baqylady.

Reıdtik is-sharalar barysynda elordanyń alty aýdanyndaǵy 500-den astam saýda orny tekserildi. Polısıa departamenti men aýdandyq ákimdikterdiń qyzmetkerleri shegilmeıtin temeki ónimderin satýdyń 100-den astam deregin anyqtady. Barlyq ónim tárkilenip, quqyq buzýshylar ákimshilik jaýapkershilikke tartyldy.

Reıdterdiń nátıjesinde quqyq buzýshylar Ákimshilik quqyq buzýshylyqtar týraly kodekstiń 196-babyna sáıkes 25 aılyq eseptik kórsetkish (AEK) kóleminde aıyppul salyna otyryp, ákimshilik jaýapkershilikke tartylýda. Barlyq ónim oqıǵa ornynda tárkilenedi.