Qazaqstanda «Astana – Taldyqorǵan» baǵytynda jańa temirjol qatynasy iske qosylady, dep habarlaidy Dala News.
Kólik ministrliginiń málimetinshe, jańa marshrýtty ashý týraly sheshim Májilis depýtattarynyń bastamasymen qabyldanyp, Kólik ministrligi, ulttyq tasymaldaýshy «Jolaýshylar tasymaly» AQ jáne azamattardyń kópjylǵy ótinishteri negizinde júzege asqan.
Jańa temirjol baǵyty Jetisý oblysynyń kólikke qoljetimdiligin arttyrýǵa, jolaýshylar suranysyn óteýge jáne elorda men óńirler arasyndaǵy qaýipsiz ári turaqty qatynasty qamtamasyz etýge baǵyttalǵan.
Alǵashqy kezeńde ulttyq tasymaldaýshy eki jolaýshylar vagonyn bóldi. Olar kún ara qatynap, №122/121 «Nurly jol – Semei» poiyzynyń quramynda júredi. Aqtoǵai stantsiiasynda vagondar №631/632 «Aqtoǵai – Taldyqorǵan» poiyzyna tirkelip, osylaisha búkil baǵyt boiynsha úzdiksiz qatynas qamtamasyz etiledi.
Ministrlik bul joba ázirge synaq rejiminde iske qosylatynyn atap ótti. Eger jolaýshylar aǵyny turaqty bolsa, vagon sany men qatynaý jiiligi kezeń-kezeńimen arttyrylmaq.
Jańa baǵyttyń ashylýy óńirler arasyndaǵy áleýmettik-ekonomikalyq bailanystardy nyǵaityp, halyqtyń qozǵalysyn jeńildetýge, ishki týrizm men iskerlik belsendilikti damytýǵa serpin beredi dep kútilýde. Sondai-aq bul Jetisý oblysynyń týristik tartymdylyǵyn arttyrýǵa yqpal etpek.
Poiyzdyń alǵashqy reisi biylǵy sáýir aiyna josparlanǵan jáne Taldyqorǵan qalasyndaǵy jańǵyrtylǵan temirjol vokzalynyń saltanatty ashylýymen tuspa-tus keledi. Jańartylǵan vokzal jolaýshylarǵa joǵary deńgeidegi jailylyq, servis jáne qaýipsizdik usynbaq.
Kólik ministrligi Memleket basshysynyń tapsyrmalaryna sáikes, jolaýshylar tasymalynyń marshrýttyq jelisin keńeitý jáne kólik qyzmetiniń sapasyn arttyrý baǵytyndaǵy júieli jumysty jalǵastyratynyn málimdedi.
