Astana mektepterinde taǵy 10 inkliýziiany qoldaý kabineti ashyldy. Endi olardyń jalpy sany 21-ge jetip, 1054 erekshe bilim berý qajettilikteri bar bala bilim ala alady,- dep habarlaidy Dalanews.kz
Inkliýzivti keńistikter logoped, defektolog, psiholog bólmeleri men qysh sheberhanasy bar arnaiy aimaqtan, sondai-aq emdik dene shynyqtyrý kabinetinen turady. Munyń bári balalarǵa qajetti daǵdylardy damytýǵa jáne mektep ortasyna qurdastarymen birge beiimdelýge kómektesedi. Mundai format bilim berý men túzetý sabaqtaryn biriktirip, oqytýdy qoljetimdi ári jaily etedi.
Joba tujyrymdamasyn «Samruk-Kazyna Trust» korporativtik qory inkliýziia salasyndaǵy sarapshylarmen birlesip ázirlegen jáne iske asyryp keledi.
«Samuryq-Qazyna» qory úshin qoǵamdy qoldaý árqashan basym baǵyt bolyp keledi. Biz sportty, meditsinany jáne inkliýziiany júieli túrde damytyp otyrmyz. Tek ótken jyly osy úsh baǵyttaǵy bastamalarymyz 700 myńnan astam adamdy qamtydy. Bastamalardyń maqsaty – damý men bilim alýda teń múmkindikter jasaý», – dedi «Samuryq-Qazyna» AQ basqarma tóraǵasy Nurlan Jaqupov.
Kabinetter «CharitySamruk Marathon» qaiyrymdylyq marafony barysynda jinalǵan qarajat jáne qordyń biýdjeti esebinen jabdyqtaldy.
«Bes jyl buryn bizdiń otbasymyz №91 mektepke kelgen bolatyn, búgin dál osy jerde inkliýziiany qoldaý kabineti ashylǵanyna óte qýanyshtymyz. Belsendi turǵyn retinde bul oqiǵaǵa ózimniń qatysym baryn sezinemin, sebebi mundai kabinetterdiń kóbi Samruk Charity Marathon arqasynda ashylýda. Sońǵy eki jyl qatarynan osy marafonǵa qatysyp júrmin jáne meniń úlesim de osyndai mańyzdy iske qosylǵanyna qýanyshtymyn», – dedi qala turǵyny Sara Bákirova.
Búginde mundai kabinetter Astanada erekshe bilim berý qajettilikteri bar balalardyń shamamen 40%-yn inkliýzivti bilimmen qamtyp otyr.
