استانا مەكتەپتەرىندە تاعى 10 ينكليۋزيانى قولداۋ كابينەتى اشىلدى. ەندى ولاردىڭ جالپى سانى 21-گە جەتىپ، 1054 ەرەكشە ءبىلىم بەرۋ قاجەتتىلىكتەرى بار بالا ءبىلىم الا الادى،- دەپ حابارلايدى Dalanews.kz
ينكليۋزيۆتى كەڭىستىكتەر لوگوپەد، دەفەكتولوگ، پسيحولوگ بولمەلەرى مەن قىش شەبەرحاناسى بار ارنايى ايماقتان، سونداي-اق ەمدىك دەنە شىنىقتىرۋ كابينەتىنەن تۇرادى. مۇنىڭ ءبارى بالالارعا قاجەتتى داعدىلاردى دامىتۋعا جانە مەكتەپ ورتاسىنا قۇرداستارىمەن بىرگە بەيىمدەلۋگە كومەكتەسەدى. مۇنداي فورمات ءبىلىم بەرۋ مەن تۇزەتۋ ساباقتارىن بىرىكتىرىپ، وقىتۋدى قولجەتىمدى ءارى جايلى ەتەدى.
جوبا تۇجىرىمداماسىن «Samruk-Kazyna Trust» كورپوراتيۆتىك قورى ينكليۋزيا سالاسىنداعى ساراپشىلارمەن بىرلەسىپ ازىرلەگەن جانە ىسكە اسىرىپ كەلەدى.
«سامۇرىق-قازىنا» قورى ءۇشىن قوعامدى قولداۋ ءارقاشان باسىم باعىت بولىپ كەلەدى. ءبىز سپورتتى، مەديسينانى جانە ينكليۋزيانى جۇيەلى تۇردە دامىتىپ وتىرمىز. تەك وتكەن جىلى وسى ءۇش باعىتتاعى باستامالارىمىز 700 مىڭنان استام ادامدى قامتىدى. باستامالاردىڭ ماقساتى – دامۋ مەن ءبىلىم الۋدا تەڭ مۇمكىندىكتەر جاساۋ»، – دەدى «سامۇرىق-قازىنا» اق باسقارما ءتوراعاسى نۇرلان جاقۇپوۆ.
كابينەتتەر «CharitySamruk Marathon» قايىرىمدىلىق مارافونى بارىسىندا جينالعان قاراجات جانە قوردىڭ بيۋدجەتى ەسەبىنەن جابدىقتالدى.
«بەس جىل بۇرىن ءبىزدىڭ وتباسىمىز №91 مەكتەپكە كەلگەن بولاتىن، بۇگىن ءدال وسى جەردە ينكليۋزيانى قولداۋ كابينەتى اشىلعانىنا وتە قۋانىشتىمىز. بەلسەندى تۇرعىن رەتىندە بۇل وقيعاعا ءوزىمنىڭ قاتىسىم بارىن سەزىنەمىن، سەبەبى مۇنداي كابينەتتەردىڭ كوبى Samruk Charity Marathon ارقاسىندا اشىلۋدا. سوڭعى ەكى جىل قاتارىنان وسى مارافونعا قاتىسىپ ءجۇرمىن جانە مەنىڭ ۇلەسىم دە وسىنداي ماڭىزدى ىسكە قوسىلعانىنا قۋانىشتىمىن»، – دەدى قالا تۇرعىنى سارا باكىروۆا.
بۇگىندە مۇنداي كابينەتتەر استانادا ەرەكشە ءبىلىم بەرۋ قاجەتتىلىكتەرى بار بالالاردىڭ شامامەن 40%-ىن ينكليۋزيۆتى بىلىممەن قامتىپ وتىر.
