– Táýelsizdik monýmenti el tarıhyndaǵy kóptegen dáýirlik oqıǵalar men onyń qalyptasý kezeńderin beıneleıdi, memleketimizdiń birtutastyǵy men beriktiginiń belgisi, – dedi A. Mamın Táýelsizdik monýmentiniń ashylýynda sóılegen sózinde.
Monýmenttiń bıiktigi – 15,7 m, dıametri – 10,9 m. Tóbesinde Qazaq handyǵynyń negizin qalaýshylar – Kereı men Jánibektiń músinderi, tómengi bóliginde Qazaqstannyń damý tarıhy beınelengen barelef ornatylǵan.
Monýmenttiń ortalyq bóliginde úsh joǵarǵy bıdiń – Tóle bı, Qazybek bı jáne Áıteke bı músinderi ornalasqan, sondaı-aq QR Tuńǵysh Prezıdenti – Elbasy Nursultan Nazarbaevtyń «Táýelsizdiktiń týyn qolda berik ustaý – Qazaqstandy óz Otanym dep sanaıtyn ár adamnyń eń basty boryshy, eń bıik maqsaty» degen dáıeksózi úsh tilde jazylǵan.
Sondaı-aq Táýelsizdik monýmentiniń ashylý saltanatyna Shyǵys Qazaqstan oblysynyń ákimi Danıal Ahmetov, fılologıa ǵylymdarynyń doktory, Shákárim atyndaǵy memlekettik ýnıversıtettiń profesory Arap Espenbetov, jazýshy Álibek Qańtarbaev jáne jeńil atletıkadan olımpıada chempıony Olga Rypakova, óńir jurtshylyǵy qatysty.
A. Mamın Qazaqstan Respýblıkasy Táýelsizdiginiń 30 jyldyǵyna arnalǵan saltanatty sharada sóılegen sózinde Shyǵys Qazaqstan oblysynyń joǵary ónerkásiptik jáne agrarlyq áleýeti bar ekenin, elimizdiń áleýmettik-ekonomıkalyq damýyna eleýli úles qosyp otyrǵanyn atap ótti.
1991 jyldan bastap jalpy óńirlik ónim 25 ese ósti. Oblysta eldiń búkil ónerkásiptik óndirisi óniminiń 10%-ǵa jýyǵy, QR barlyq óńdelgen óniminiń 11%-dan astamy óndiriledi.
Óńir – QR-da jetekshi oryn alatyn qýatty ındýstrıalyq ortalyq. Indýstrıalandyrý baǵdarlamasy oblysta buǵan deıin shyǵarylmaǵan, qosylǵan quny joǵary ondaǵan jańa ónim túrin óndirýdi uıymdastyrýǵa jol ashty.
Óńir ekonomıkasynyń mańyzdy sektory – agroónerkásiptik keshen, ol elimizdiń azyq-túlik qaýipsizdigin qamtamasyz etýge yqpal etedi.
Kólik jáne ınjenerlik ınfraqurylym belsendi túrde jańǵyrtylyp jatyr, balabaqshalar, mektepter, medısına jáne sport obektileri salynýda. Táýelsizdik jyldarynda 8 mln sharshy metrden astam turǵyn úı salyndy.
Oblystyń áleýetin damytý aıasynda 2025 jylǵa deıin metalýrgıa, hımıa ónerkásibi, AÓK, energetıka, JEK, qurylys sıaqty perspektıvaly salalarda jalpy somasy 4,5 trln teńge bolatyn 200-ge jýyq mańyzdy ınvestısıalyq jobany iske asyrý josparda bar.
Sonymen qatar saltanatty jıynda Shyǵys Qazaqstan oblysynyń ákimi Danıal Ahmetov sóz sóıledi.
Memleket basshysy Qasym-Jomart Toqaevtyń Jarlyǵyna sáıkes, QR Premer-Mınıstri A. Mamın Táýelsizdik kúnine oraı Shyǵys Qazaqstan oblysynyń aýyl sharýashylyǵy jáne ónerkásip kásiporyndarynyń basshylary men jumysshylaryna, bilim, densaýlyq saqtaý jáne sport salalarynyń qyzmetkerlerine memlekettik nagradalardy tabystady.
II dárejeli «Dostyq» ordenimen Shyǵys Qazaqstan oblysy Qazaqstan halqy Assambleıasynyń Qoǵamdyq kelisim keńesiniń tóraǵasy Gennadıı Pýssep marapattaldy.
«Qurmet» ordenimen «Qazmyrysh» JSHS komersıa jónindegi atqarýshy dırektory Igor Radovıch, «Úlbi metalýrgıa zaýyty» AQ basqarma tóraǵasy Sergeı Bejeskıı, «Óskemen tıtan-magnıı kombınaty» AQ prezıdenti Ásem Mamýtova, Oralhan Bókeı atyndaǵy №44 lıseıdiń muǵalimi Baǵjamal Sadyqova marapattaldy.
III dárejeli «Eńbek dańqy» ordenimen «Tóre-Toǵam» JSHS traktorshysy Ómirtaı Ásipov jáne «Qazaqstan Respýblıkasy Ulttyq bankiniń Qazaqstan teńge saraıy» RMK baǵaly metaldardan jasalǵan buıymdar ýchaskesiniń galvanıgi Lúdmıla Grechýhına marapattaldy.
«Eren eńbegi úshin» medalimen Shyǵys Qazaqstan oblystyq buqaralyq sport túrleri boıynsha joǵary sport sheberligi mektebiniń jattyqtyrýshy-oqytýshysy Aıdar Qaıyrbaev marapattaldy.
«Shapaǵat» medalimen Shemonaıha aýdandyq aýrýhanasynyń bas medbıkesi Vera Sheplákova, QR Qurmet gramotasymen «Algúl» sharýa qojalyǵynyń basshysy Álibek Bahtıarov marapattaldy.
