Kólemdi maqalanyń Atabekke qatysty tusyn tilip alyp, oqyrman nazaryna usynǵandy jón kórdik.
"Endi, qurmetti Asqar, myna bir aýyr oiymdy tyńdaǵyn, bul meniń ǵana emes, bolǵan istiń mán-jaiyn anyq bilgen myńdaǵan qazaqtyń oiy dei alamyn.
2006 jyly shilde aiynda Almaty irgesinde «Shańyraq oqiǵasy» boldy ǵoi. «Ruhsatsyz ornaǵan» qazaq aýyldaryna oida joqta tańǵa jýyq shabýyl jasalyp, úileri býldozermen súrile bastady! Tańǵa jýyq!..
Shoshyp oianǵan turǵyndardyń qolynan kelgen áýelgi qarsylyq jigitterdiń: «Bul ne sumdyq?!» degen aiqaiy, áielderdiń oibaiy, qorqyp ketken qarttardyń bajyldaýy, balalardyń shyryldap jylaýy boldy. Shańyraǵyn, otbasyn qorǵaýǵa májbúr jigitter shabýylshyldarǵa top-tobymen umtylyp, qaqtyǵys bastaldy.
Qyzýqandy Azamat aqyn Aron Atabektiń biliktiń adamgershilikke jat qarakúsh qylmysyn aiyptaǵan janaiqaiy tóńirekti jańǵyryqtyrdy. Qaqtyǵysta bir politsei qazaǵa ushyrady. Áldebir ámirshi ony «Aron Atabektiń toby óltirgenin kóripti».
Bir jerimen diirmen tartqyshtar sol «derek» boiynsha Arondy eki jyl tergep, 2008-jyly qazan aiynyń 5-i kúni 18 jylǵa túrmede otyrýǵa sottatyp tynshydy. Bizde bola beretin jazyqsyz jazalaýdyń biri!
Táýelsiz zańgerlerdiń, adam quqyn qorǵaýshy halyqaralyq uiymdardyń anyqtaýy nátijesinde, Aron Atabektiń sottalýy negizsiz ekeni dáleldense de, bizdiń aitqanyn istetkish «kúshtiler» myńq etpedi. Azbas-tozbas nemquraidylyq!
Aronnyń túrmede otyrǵanyna 12 jyl. Halyqaralyq politsiia qolǵa túsirgen qylmyskerdei qatań baqylaýda. Densaýlyǵy nasharlap barady. Dárigerlik kómek tyńǵylyqty emes.
Halyqaralyq uiymdar, bizdiń oppozitsiialyq baǵyttaǵy saiasi qairatkerler, jýrnalshylar, jazýshylar, iaǵni Aron Atabektiń kim ekenin jaqsy biletin jurtshylyq joǵarydaǵy tiisti oryndarǵa jasy 55-ten asqan (qazirde 67 jasta) Azamat aqyn isin qaita qaraýdy, ádildikke kóz jetkizýdi talap etken, keiinde jeńildik jasaýdy ótingen hatty áldeneshe joldady.
Amal ne, qulaq asýǵa tiistilerdiń birde-biri selt etpedi. Bizdegi basshy sheneýnikter táýelsizdikti: «qai máseleni qashan, qalai sheshemin, ol óz erkimde, men táýelsizbin!» dep biletin siiaqty. Shynynda, «slaviandyq úshtiktiń» arqasynda bizge de ońai olja bolǵan táýelsizdik halyqqa emes, bilik tobyndaǵylarǵa buiyrǵan tárizdi.
Ádiletti memleket ekenimiz ras bolsa, bilikten qiianat kórgenderdi qorǵap baqqany úshin jalǵan aiypqa jem bolǵan Aron Atabekke basbostandyǵyn qaitaryp berýdi oilastyrǵyn...".
Sálemmen, - Ǵabbas Qabyshuly, jýrnalshy-jazýshy
