كٶلەمدٸ ماقالانىڭ اتابەككە قاتىستى تۇسىن تٸلٸپ الىپ, وقىرمان نازارىنا ۇسىنعاندى جٶن كٶردٸك.
"ەندٸ, قۇرمەتتٸ اسقار, مىنا بٸر اۋىر ويىمدى تىڭداعىن, بۇل مەنٸڭ عانا ەمەس, بولعان ٸستٸڭ مەن-جايىن انىق بٸلگەن مىڭداعان قازاقتىڭ ويى دەي الامىن.
2006 جىلى شٸلدە ايىندا الماتى ٸرگەسٸندە «شاڭىراق وقيعاسى» بولدى عوي. «رۇحساتسىز ورناعان» قازاق اۋىلدارىنا ويدا جوقتا تاڭعا جۋىق شابۋىل جاسالىپ, ٷيلەرٸ بۋلدوزەرمەن سٷرٸلە باستادى! تاڭعا جۋىق!..
شوشىپ ويانعان تۇرعىنداردىڭ قولىنان كەلگەن ەۋەلگٸ قارسىلىق جٸگٸتتەردٸڭ: «بۇل نە سۇمدىق?!» دەگەن ايقايى, ەيەلدەردٸڭ ويبايى, قورقىپ كەتكەن قارتتاردىڭ باجىلداۋى, بالالاردىڭ شىرىلداپ جىلاۋى بولدى. شاڭىراعىن, وتباسىن قورعاۋعا مەجبٷر جٸگٸتتەر شابۋىلشىلدارعا توپ-توبىمەن ۇمتىلىپ, قاقتىعىس باستالدى.
قىزۋقاندى ازامات اقىن ارون اتابەكتٸڭ بيلٸكتٸڭ ادامگەرشٸلٸككە جات قاراكٷش قىلمىسىن ايىپتاعان جانايقايى تٶڭٸرەكتٸ جاڭعىرىقتىردى. قاقتىعىستا بٸر پوليتسەي قازاعا ۇشىرادى. ەلدەبٸر ەمٸرشٸ ونى «ارون اتابەكتٸڭ توبى ٶلتٸرگەنٸن كٶرٸپتٸ».
بٸر جەرٸمەن ديٸرمەن تارتقىشتار سول «دەرەك» بويىنشا اروندى ەكٸ جىل تەرگەپ, 2008-جىلى قازان ايىنىڭ 5-ٸ كٷنٸ 18 جىلعا تٷرمەدە وتىرۋعا سوتتاتىپ تىنشىدى. بٸزدە بولا بەرەتٸن جازىقسىز جازالاۋدىڭ بٸرٸ!
تەۋەلسٸز زاڭگەرلەردٸڭ, ادام قۇقىن قورعاۋشى حالىقارالىق ۇيىمداردىڭ انىقتاۋى نەتيجەسٸندە, ارون اتابەكتٸڭ سوتتالۋى نەگٸزسٸز ەكەنٸ دەلەلدەنسە دە, بٸزدٸڭ ايتقانىن ٸستەتكٸش «كٷشتٸلەر» مىڭق ەتپەدٸ. ازباس-توزباس نەمقۇرايدىلىق!
اروننىڭ تٷرمەدە وتىرعانىنا 12 جىل. حالىقارالىق پوليتسييا قولعا تٷسٸرگەن قىلمىسكەردەي قاتاڭ باقىلاۋدا. دەنساۋلىعى ناشارلاپ بارادى. دەرٸگەرلٸك كٶمەك تىڭعىلىقتى ەمەس.
حالىقارالىق ۇيىمدار, بٸزدٸڭ وپپوزيتسييالىق باعىتتاعى ساياسي قايراتكەرلەر, جۋرنالشىلار, جازۋشىلار, ياعني ارون اتابەكتٸڭ كٸم ەكەنٸن جاقسى بٸلەتٸن جۇرتشىلىق جوعارىداعى تيٸستٸ ورىندارعا جاسى 55-تەن اسقان (قازٸردە 67 جاستا) ازامات اقىن ٸسٸن قايتا قاراۋدى, ەدٸلدٸككە كٶز جەتكٸزۋدٸ تالاپ ەتكەن, كەيٸندە جەڭٸلدٸك جاساۋدى ٶتٸنگەن حاتتى ەلدەنەشە جولدادى.
امال نە, قۇلاق اسۋعا تيٸستٸلەردٸڭ بٸردە-بٸرٸ سەلت ەتپەدٸ. بٸزدەگٸ باسشى شەنەۋنٸكتەر تەۋەلسٸزدٸكتٸ: «قاي مەسەلەنٸ قاشان, قالاي شەشەمٸن, ول ٶز ەركٸمدە, مەن تەۋەلسٸزبٸن!» دەپ بٸلەتٸن سيياقتى. شىنىندا, «سلاۆياندىق ٷشتٸكتٸڭ» ارقاسىندا بٸزگە دە وڭاي ولجا بولعان تەۋەلسٸزدٸك حالىققا ەمەس, بيلٸك توبىنداعىلارعا بۇيىرعان تەرٸزدٸ.
ەدٸلەتتٸ مەملەكەت ەكەنٸمٸز راس بولسا, بيلٸكتەن قييانات كٶرگەندەردٸ قورعاپ باققانى ٷشٸن جالعان ايىپقا جەم بولعان ارون اتابەككە باسبوستاندىعىن قايتارىپ بەرۋدٸ ويلاستىرعىن...".
سەلەممەن, - عابباس قابىشۇلى, جۋرنالشى-جازۋشى
