Oblys ortalyǵynda Shyǵys Qazaqstan oblysy men Óskemen qalasynyń ákimderi óńir turǵyndarymen ashyq formatta kezdesý ótkizdi. Mańyzdy jiyn qoǵam men bilik arasyndaǵy ózara senimdi nyǵaityp, óńirdiń áleýmettik-ekonomikalyq damýyna qatysty ózekti máselelerdi keńinen talqylaýǵa múmkindik berdi, dep habarlaidy Dalanews.kz.
Kezdesý barysynda qala men oblystyń damýyna qatysty negizgi nátijeler qorytyndylanyp, aldaǵy jyldarǵa arnalǵan strategiialyq basymdyqtar aiqyndaldy. Atqarýshy bilik ókilderi óz jumystarynyń Memleket basshysynyń naqty tapsyrmalaryna sai júzege asyrylyp jatqanyn atap ótti. El damýynyń jeti negizgi baǵyty belgilenip, sonyń ishinde tsifrlandyrý men jasandy intellektini keńinen engizý ekonomikany jáne memlekettik basqarýdy jańǵyrtýdyń mańyzdy tetigi retinde qarastyrylýda. Aldaǵy úsh jyl ishinde tolyqqandy tsifrlyq memleket qalyptastyrý mindeti tur.
Jyl qorytyndylary ShQO-nyń áleýmettik-ekonomikalyq áleýetiniń birtindep nyǵaiyp kele jatqanyn kórsetedi. On bir aidyń nátijesinde óńirde oń serpin saqtalyp, jumyssyzdyq deńgeii 4,6% kóleminde turaqtady. Shamamen 25 myń jańa jumys orny ashylyp, onyń basym bóligi turaqty jumyspen qamtýǵa baǵyttaldy. Ortasha ailyq jalaqynyń 9,5% ósýi halyqtyń turmys sapasynyń arta túskenin ańǵartady.
Ónerkásip salasy óńir ekonomikasynyń berik tiregi bolyp qala beredi. Búginde ol jalpy óńirlik ónimniń shamamen 40% qamtamasyz etip otyr. Alǵa qoiylǵan strategiialyq maqsat — 2029 jylǵa qarai ekonomikalyq ósimdi eki esege jetkizý. Bul jolda óńdeýshi ónerkásipti damytý, mashina jasaý salasyn ilgeriletý, shaǵyn jáne orta biznesti qoldaý, investitsiia tartý jáne syrtqy naryqqa táýeldilikti azaitý basty basymdyqtar retinde belgilendi.
Kezdesýde óńir ekonomikasynyń keleshegi zor baǵyttarynyń biri — týrizmdi damytý máselesine de airyqsha nazar aýdaryldy.
– Týrizm — bul eń aldymen sapaly infraqurylym. Jol, bailanys, qaýipsizdik pen qyzmet kórsetý mádenieti qatar damyǵanda ǵana týrizm óńirdiń qýatty draiverine ainalady. Bul baǵyttaǵy jumystar kezeń-kezeńimen júzege asyrylyp keledi, – dep atap ótti ShQO-nyń ákimi Nurymbet Saqtaǵanov.
Sondai-aq Óskemen qalasynyń aldaǵy damý josparlary tanystyryldy. Oblystyń barlyq aýmaqtary boiynsha bes jyldyq ekonomikalyq ósim josparlary bekitilip, óńirde júzege asyrylatyn jobalardyń jalpy quny 2,8 trln teńgege jetti. Onyń ishinde 2,3 trln teńge jeke investitsiialarǵa tiesili bolsa, 522,4 mlrd teńge biýdjet qarajaty esebinen qarastyrylǵan.
Óskemen qalasyn 2029 jylǵa deiin damytý josparyna sáikes, qala biýdjetine 193,6 mlrd teńge bólinip, jeke investitsiialar kólemi 744,4 mlrd teńge deńgeiinde josparlanýda. Qalalar men aýdandar ákimderimen jobalardy sapaly ári ýaqytynda iske asyrýdy kózdeitin KPI-memorandýmdarǵa qol qoiyldy.
Oblys ortalyǵy óńirdegi ónerkásip óndirisiniń negizgi bóligin qurap otyr: qala úlesine oblys boiynsha óndiristiń 78,7% tiesili, al óńdeýshi sektordyń úlesi 95% asady. Sonymen qatar, qala quraýshy kásiporyndar kórsetkishteriniń tómendeýine bailanysty óndiris kóleminiń 5,6% qysqarýy tirkeldi. Osyǵan orai óndiristik qýattardy turaqtandyrýǵa baǵyttalǵan naqty sharalar qabyldandy.
