Qyzylorda oblysynda qudaıylarda, astarda sybaılas jemqorlyqtyń zıandylyǵy týraly ýaǵyzdar aıtý týraly bastama kóterildi.
Bul týraly aımaqtaǵy túrli dinı uıymdardyń ókilderi qatysqan «Sybaılas jemqorlyqqa qarsy mádenıetti qalyptastyrýdaǵy rýhanıat pen adamgershilik» atty dóńgelek ústelde aıtyldy.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamenti oblystyq ishki saıasat basqarmasy jáne Din máselelerin zertteý ortalyǵymen birlesip uıymdastyrǵan sharanyń maqsaty - dinı birlestikterdiń áleýetin paıdalana otyryp sybaılas jemqorlyqqa qarsy kúreske azamattardy, onyń ishinde jamaǵatty, dinı qaýym múshelerin (prıhojane) tartý.
Departament basshysynyń orynbasary Berikbol Baıhojaev:
"Búkil álemde sybaılas jemqorlyqqa qarsy kúreste jetekshi qural bola alatyn dinniń qoǵamdyq prosesterge yqpaly jyl saıyn artyp keledi. Din qoǵamda sybaılas jemqorlyqqa mádenıetti qalyptastyrýda úlken áleýetke ıe. Sondyqtan Departament tarapynan halyq kóp jınalatyn oryndarda, qudaıylarda, astarda men ózge de dinı is-sharalarda jemqorlyqqa qarsy ýaǵyzdar aıtý usynyldy"
- deıdi.
Jıynda sóılegen Din máselelerin zertteý ortalyǵynyń dırektory B.Kamalov, Qazaqstan musylmandary dinı basqarmasynyń Qyzylorda oblysy boıynsha ókili B.Abýov jáne Pravoslavtyq shirkeý jetekshisi V.Ivanshının kisiniń aqysyn jeý, amanatqa qıanat jasaý, para berý men para alý, tipti para berýge úgitteý de kúná ekendigin aıtty.
Qazaqstan musylmandary dinı basqarmasynyń Qyzylorda oblysy boıynsha ókili Bolatbek Abýov óz sózinde: "Túpkilikti maqsatymyz ben mindetimiz - halyqty ımandylyqqa, adaldyqqa, adamgershilikke shaqyrý bolǵandyqtan, halyq arasynda rýhanı adamgershilik pen adaldyq qundylyqtaryn keńinen nasıhattaýda birlesip jumys jasaýdy biraýyzdan qoldaımyz", - dedi.
Elimizde sońǵy jyldary dinge bet burǵandardyń qatary artqan. Onyń ishinde din talaptaryn ustanatyn jastar sany ósken. WIN/Gallup halyqaralyq uıymynyń málimeti boıynsha elimizde ózin dinı adammyn dep esepteıtin azamattardyń úlesi 64 paıyzdy quraıdy
