Túrkistan oblysynyń Arys qalasynda jantúrshigerlik jol apaty bolyp, tórt adam kóz jumdy, dep habarlaidy dalanews.kz.
Aldyn ala málimetter boiynsha, áiel adam basqarǵan kólik jekemenshik úidiń qorshaýyna soǵylyp, úidiń aldynda oryndyqta otyrǵan adamdardy qaǵyp ketken. Saldarynan tórt adam qaza tapqan. Qaza bolǵandardyń arasynda eki kishkentai bala men júkti áiel bar.
Oqiǵa saldarynan taǵy eki adam aýyr jaraqat alyp, aýrýhanaǵa jetkizilgen.
Jýrnalist Mihail Kozachkovtyń derekkóziniń málimetinshe, kólik tizgininde 52 jastaǵy Bibinur Qasymova bolǵan. Ol mektepte jumys isteitini, al bos ýaqytynda taksi qyzmetimen ainalysatyny aitylǵan.
Saraptama qorytyndysy boiynsha, áiel adam apat kezinde alkogoldik mas kúide bolǵan.
Qazirgi tańda oǵan abaisyzda jasalǵan qylmys baby boiynsha aiyp taǵylýy múmkin. Mihail Kozachkov qoldanystaǵy zańnama boiynsha mundai qylmys úshin eń joǵary jaza 10 jylǵa deiin bas bostandyǵynan aiyrý ekenin, alaida taraptardyń tatýlasýy nemese shartty túrde merziminen buryn bosap shyǵý múmkindigi qoǵamda qyzý talqylanyp jatqanyn atap ótti.
Osy oqiǵadan keiin jýrnalist mas júrgizýshilerge qatysty jazany kúsheitý máselesin kóterip, depýtattarǵa úndeý joldaǵan.
