Elbasy Nursultan Ábishulynyń «Prezidenttiń bes áleýmettik bastamasy» atty halyqqa úndeýi – ekonomikamyzǵa jasalǵan jańa impýls bolǵany sózsiz. Osy oraida bul úndeýdiń júzege asý perspektivasy týraly talai oilar aitylǵan bolatyn. Eń áýelgi qyzyqtyryp otyrǵan aimaq, ol – Túrkistan oblysy. Qurylǵanyna úsh ai tolmaǵan jańa óńirdiń ekonomikalyq, áleýmettik qaýqary qandai? Atalmysh úndeý osy óńirge qalai áser etedi? Bul kúntizbe betindegi negizgi suraqtardyń biri.
Qazaqta «taýyq soisa da qasapshy soisyn» degen bir naqyl sóz bar. Biz de osy oraida jańa qurylǵan oblystyń bolashaq perspektivasy týraly sarapshy mamannan suraýdy jón kórdik.
Elbasy úndeýi Túrkistan oblysynda qalai júzege asady degen másele boiynsha belgili saiasatker ári sarapshy Artýr Nyǵmetov óz pikirimen bólisken bolatyn:
Al osy jerde joǵaryda aty atalǵan memlekettik organdardyń qyzmetkerleri qaida turyp jatyr degen zańdy suraq týyndaityndyǵy belgili. Qazirgi tańda memlekettik qyzmetkerler ýaqytsha turǵyn úi, jataqhanamen qamtylyp jatyr eken.
Oraiy kelgende aita ketsek, Túrkistandy túletemin dep, kieli shaharǵa qonys aýdarǵan qyzmetkerlerge Elbasynyń bes áleýmettik bastamasy aiasyndaǵy jumystar sharapatyn tigizedi dep oilaimyn.
Tarqatyp aitsaq, Túrkistannyń damýyna oń serpin beretin baǵdarlamanyń birinshi baǵyty buqarany baspanamen qamtýdy kózdeidi emes pe?! Mine, sabaqty ine sátimen degen osy bolsa kerekti. Iaǵni kúni keshe Úkimet basshysynyń aldynda oblys ákimi J.Túimebaev Túrkistanda 1200 páterlik 20 kópqabatty turǵyn úidiń, Kentaýda 420 páterlik jeti úidiń qurylysy júrgizilip jatqandyǵyn aitty. Nysandardyń qurylysy 2019 jyly aiaqtalady. Munan bólek, Prezidenttiń bes áleýmettik bastamasyn iske asyrý aiasynda «7-20-25» baǵdarlamasyn júzege asyrý úshin áleýmettik-kásipkerlik korporatsiia 360 páter bolatyn alty kópqabatty turǵyn úidiń qurylysyn bastaǵan.
Mine, az ǵana ýaqyttyń ishinde kieli shaharda baspanaly bolamyn degen nietti jańdardyń armanyna jol salyna bastady.
Munan ózge, Elbasynyń bes áleýmettik bastamasynda kózdelgen «Jalaqysy tómen jumysshy, qyzmetkerlerge salyqtyq jeńildikter jasaý, jastardyń bilim alýy men jataqhanamen qamtylýyna bailanysty oryndalatyn mindetter de qazirgi tańda júrgizilip jatqan tyndyrymdy tirlikterge erekshe serpin berip, jumystar úsh ese qarqynmen júrgizilýi tiis dep sanaimyn.
Elbasy usynǵan «7-20-25» baǵdarlamasy túrkistandyq qanshama jastyń armanyna qol jetkizýge jol ashady. «Óz úiim – óleń tósegim» deitin qýanyshty sáttiń oryndalaryna da az qaldy. Al jataqhanaǵa qatysty máseleniń ońtaily sheshimin tabýy da yntaly jastardyń kóńilin demdese, stýdentterdiń jataqhanamen qamtylýy óz kezeginde izdenimpaz jastardyń alańsyz bilim alýyna mol múmkindik syilap otyr.
Túrkistandy túletip, túrlendirýde bes áleýmettik bastamanyń berer jaqsylyǵy molynan bolmaq. Olai deýge sebep, toǵyz joldyń torabynda ornalasqan kieli shaharda shaǵyn jáne orta kásipkerliktiń jumysyn jandandyrý qalanyń týristik áleýetin arttyrýda róli zor bolmaq».
