Qazaqstandaǵy Adam quqyqtary jónindegi ýákil Artýr Lastaev qyz alyp qashý áreketi zań talaptaryn óreskel buzý ekenin aitty, dep habarlaidy dalanews.kz.
Ol bul pikirin Parlament Májilisinde ótken stalking pen qyz alyp qashýǵa qarsy is-qimyl máselelerine arnalǵan dóńgelek ústelde aitylǵan pikirtalastarǵa bailanysty bildirdi.
Onyń aitýynsha, ótken jyldyń kúzinde qyz alyp qashý áreketi úshin qylmystyq jaýaptylyqty kózdeitin zań kúshine engen. Bul másele 2023 jyldan beri kóterilip, saraptamalyq jáne túsindirý jumystary júrgizilgen.
«Adam urlaýdyń kez kelgen túri zań talaptaryn óreskel buzý bolyp tabylady. Bul quqyqqa qaishy áreket mádenietke, ulttyq dástúrlerge, otbasylyq nemese kez kelgen ózge de ómirlik mán-jailarǵa silteme jasaý arqyly eshqandai erekshelik retinde tanylmaidy jáne aqtaýǵa jatpaidy», – dedi Artýr Lastaev.
Ol Qazaqstan Respýblikasy Qylmystyq kodeksiniń 125-babyna sáikes adam urlaý qylmysy úshin 15 jylǵa deiin bas bostandyǵynan aiyrý jazasy qarastyrylǵanyn eske saldy.
Sondai-aq ombýdsmen bul árekettiń qazaq halqynyń dástúrleri men ádet-ǵuryp quqyǵyna eshqandai qatysy joq ekenin atap ótti.
Artýr Lastaev Konstitýtsiiaǵa sáikes neke memleket belgilegen tártippen tirkelgen er men áieldiń erikti ári teń quqyqty odaǵy ekenin aitty.
«Qazaqstan Respýblikasynyń azamattaryn Konstitýtsiia men ózge de zańdardyń talaptaryn qatań saqtaýǵa shaqyramyn», – dedi ol.
