Elbrýs taýyna kóterilý kezinde 11 jastaǵy bala qaza taýyp, onyń ákesi aýyr jaraqat aldy. Bul týraly Resei Tótenshe jaǵdailar ministrliginiń Elbrýs biik taýly izdestirý-qutqarý jasaǵy habarlady, dep jazady dalanews.kz.
Qaiǵyly oqiǵa teńiz deńgeiinen shamamen 4200-4600 metr biiktikte bolǵan. Zardap shekkenderdi izdeýge 12 qutqarýshy attandy.
Ákesi men balasy Donetskiden shyqqan
Mektep oqýshysy 40 jastaǵy ákesi Romanmen birge taýǵa shyqqan. Mash arnasynyń aldyn ala málimetinshe, olar keri túsip kele jatqanda qaýipsizdik arqany úzilip ketken.
"Olar kózdegen jerine jetip, tómen túse bastaǵan. Sol sátte, aldyn ala málimet boiynsha, saqtandyrý arqany úzilgen. Bala alǵan jaraqattarynan qaza tapty. Al er adamnyń qabyrǵalary men tizeleri synǵanymen, ol kómek shaqyra alǵan", – dep jazady arna.
Roman men onyń uly Donetskiden shyqqan. Sońǵy jyldary olar Stavropol ólkesindegi Ryzdvianyi kentinde turǵan.
Byltyr ákesi men balasy Elbrýsqa taǵy kóterilgen. Alaida balanyń jaǵdaiy nasharlap, shyńǵa 300 metr qalǵanda keri qaitýǵa májbúr bolǵan. Soǵan qaramastan, olar Garabashi stantsiiasynda bala oqityn mekteptiń týyn kóterip, bilim ordasy basshylyǵynyń alǵysyna ie bolǵan.
Ákesi men balasy kúrdeli baǵytty tańdaǵan
Mash málimetinshe, ákesi balasynyń denesiniń janynda qutqarýshylardy kútken. Jer bederiniń kúrdeli bolýyna bailanysty ony birden evakýatsiialaý múmkin bolmaǵan.
Arna er adamnyń áýesqoi alpinist bolǵanyn jáne taýdyń barlyq baǵytyn baǵyndyrýdy armandaǵanyn jazady. Byltyr ol balasymen birge Elbrýstyń soltústik betkeiine kóterilse, biyl shyǵys baǵytyn tańdaǵan. Bul baǵyt eń kúrdeli baǵyttardyń biri sanalady.
Aqparatqa sáikes, kóterilý kezinde balasymen birge júrgen taǵy bir týrist er adamǵa ári qarai barýdyń qaýipti ekenin eskertken. Alaida ol bul eskertýge qaramastan jolyn jalǵastyrǵan.
Evakýatsiia 20 shildege josparlandy
Qutqarýshylar jaralanǵan er adam men onyń qaza tapqan ulyn Elbrýstyń shyǵys betkeiinen, shamamen 4200 metr biiktikten tapty.
Qarańǵy túsýine bailanysty evakýatsiiany 20 shildege qaldyrý týraly sheshim qabyldanǵan. Bul jóninde Resei Tótenshe jaǵdailar ministrliginiń Kabardin-Balqar Respýblikasy boiynsha basqarmasy habarlady.
Olardy taýdan túsirý úshin kommertsiialyq tikushaq paidalaný josparlanǵan.
Tótenshe jaǵdailar qyzmetiniń málimetinshe, ákesi men balasynyń týristik baǵyty aldyn ala tirkelmegen.
