Armeniia parlamenti vitse-spikeri Rýben Rýbinian reseilik nasihatshy Vladimir Soloviovtiń málimdemesine qatysty pikir bildirip, ony belgili máteldegi "itke" teńedi, dep habarlaidy Dalanews.kz.
"It úredi, kerýen kóshedi. Bul jaǵdaida it - reseilik kásipker Samvel Karapetiannyń jaqyn dosy ári otandasy Soloviov, al kerýen - beibitshilik pen damý jolyna bet alǵan súiikti elimiz", - dep jazdy ol Facebook jelisindegi paraqshasynda.
Eske salaiyq, buǵan deiin reseilik nasihatshy Vladimir Soloviov Máskeý "arnaiy áskeri operatsiiany" tek Ýkraina aýmaǵynda emes, postkeńestik keńistiktegi ózge elderde de bastaýy múmkin ekenin málimdegen edi.
Onyń aitýynsha, Resei úshin eń qaýipti óńirlerdiń qataryna Armeniia men Ortalyq Aziia elderi jatady. Soloviov bul aimaqtardyń ulttyq qaýipsizdik turǵysynan Siriia nemese Venesýeladaǵy jaǵdaidan áldeqaida mańyzdy ekenin atap ótti.
"Armeniiadan aiyrylý - asa úlken másele. Aziiadaǵy, naqtyraq aitqanda ózderi Ortalyq Aziia dep ataityn óńirdegi túitkilder - biz úshin aýqymdy qater. Sondyqtan maqsattarymyz ben mindetterimizdi ashyq ári naqty aiqyndaý qajet. “Oiyn aiaqtaldy” dep týra aitý kerek. Halyqaralyq quqyq pen halyqaralyq tártipke súienýdiń qajeti joq. Eger ulttyq qaýipsizdigimiz úshin Ýkrainada arnaiy áskeri operatsiia bastaýǵa májbúr bolsaq, dál osy ýájben ózimiz yqpal aimaǵy dep sanaityn basqa óńirlerde de osyndai qadamǵa barýǵa ne kedergi?", - degen edi ol.
Aita keteiik, qazaqstandyq saiasattanýshy Ǵaziz Ábishev te reseilik nasihatshy Vladimir Soloviovtiń Ortalyq Aziia men Kavkazǵa qatysty daýly málimdemesine pikir bildirgen edi.
Ábishevtiń aitýynsha, Soloviovtiń sózderi Kremldiń syrtqy saiasi signaldarynyń biri bolýy múmkin nemese jekelegen saiasi demarsh retinde de qarastyrylýy yqtimal. Ol mundai jariia ári sebepsiz málimdemelerdi odaqtas elderge qatysty memleketaralyq qarym-qatynas ádebiniń buzylýy dep baǵalady.
"Geosaiasi múddeni ashyq aitý - bir másele, al kórshi eldermen yqtimal áskeri qaqtyǵysqa qoǵamdy aldyn ala psihologiialyq turǵyda daiyndaý - múlde bólek", - dedi saiasattanýshy.
Sondai-aq ol mundai óshpendi ritorika Qazaqstan sekildi elderdiń kópvektorly saiasat júrgizýine qatysty orynsyz kúdik týdyratynyn atap ótti. Onyń sózinshe, dál osyndai málimdemelerden keiin ózge memlekettermen, onyń ishinde áskeri yntymaqtastyqty damytý teris qabyldana bastaidy.
