Astananyń qylmystyq ister jónindegi aýdanaralyq soty Ulttyq mýzeidiń burynǵy direktory, eks-ministr Arystanbek Muhamediulyna qatysty úkim shyǵardy, - dep habarlaidy Dalanews.kz.
Úkimdi Astananyń qylmystyq ister jónindegi aýdanaralyq sotynyń sýdiasy Kemeńger Imashev jariialady. Sotta jymqyrý arqyly bótenniń múlkin urlaý áreketin uiymdastyrǵany jáne oǵan járdemdeskeni úshin birneshe adamǵa qatysty úkim shyqty.
"Arystanbek Muhamediuly mádeniet ministri jáne odan keiin Ulttyq mýzeidiń direktory bolǵan ýaqytynda urlyqty uiymdastyrýshy bola otyryp, óziniń orynbasarlarymen aldyn ala sóz bailasý arqyly adamdarmen birge, 2017-2019 jyldar aralyǵynda "Álem murajailary boiynsha Altyn adamnyń sherýi" halyqaralyq kórme jobasyn iske asyrý sheńberinde "E." JShS direktorynyń orynbasary men býhgalteriniń kómegimen 1,5 mlrd. teńge somasyna baǵany kóterý jolymen, is júzinde qyzmet kórsetpei jáne taýardy tiep-jóneltpei, asa iri mólsherde biýdjet aqshasyn jumsaý jolymen jymqyrǵan.
Sondai-aq, ol N.-men aldyn ala sóz bailasý arqyly adamdarmen birge 2017-2018 jyldary ulttyq kinokollektsiiany tsifrlandyrýdy júrgizýge jalpy somasy 196 mln. teńgeden asa memlekettik satyp alý sharttaryn jasasý kezinde biýdjet qarajatyn jymqyrdy.
Ol óziniń qyzmettik ókilettikterin teris paidalanyp, "Sý jáne qoldanbaly sport túrleri boiynsha Respýblikalyq joǵary sport sheberligi mektebi" RMQK-ny zańsyz jekeshelendirip, memleketke 332 mln. teńge somasyna asa iri mólsherde zalal keltirdi (QK 361-baby 4-bóliginiń 3) tarmaǵy);
"Ex." JShS direktorymen (jeke óndiriske bólingen) 2019-2020 jyldar aralyǵynda "Qazaqstannyń ulttyq kieli oryndary men murajai qorlaryn jalpymemlekettik fotogrammetriialyq 3D-skanerleý" jobasyn iske asyrýǵa jasalǵan memlekettik satyp alý týraly sharttar boiynsha bólingen 1,5 mlrd. teńgeden astam biýdjet qarajatyn urlaǵan.
M.A. "Akterek LTD" JShS (Diplomat qonaqúii) jarǵylyq kapitalynyń 29 paiyz úlesin iemdený túrinde reiderlik áreket jasaýǵa tyrysqan", - dep jazylǵan sot málimetinde.
Sottalýshylardyń kinási jábirlenýshiniń, jábirlenýshiniń ókiliniń, kýágerlerdiń aiǵaqtarymen, mamandar men sarapshynyń qorytyndylarymen, hattamalarmen, sottalýshylar men kýágerlerdiń jumys orny boiynsha tintý hattamalarymen, qylmystyq istiń basqa da materialdarymen dáleldendi.
Sotta prokýror aiypty qoldap, sottan sottalýshylarǵa 2 jyldan 12 jylǵa deiin bas bostandyǵynan aiyrý jazasyn taǵaiyndaýdy, sonymen qatar, QR Mádeniet jáne sport ministrliginiń jáne jábirlenýshi K.-nyń materialdyq zalaldy óndirip alý týraly azamattyq talabyn qanaǵattandyrýdy surady. Al advokattar sottalýshylardy aqtaýdy surady.
Sot úkimimen Arystanbek Muhamediuly QK-niń 28-babynyń 3-bóligi - 189-baby 4-bóliginiń 2) tarmaǵy, 361-baby 4-bóliginiń 3) tarmaǵy, 24-babynyń 3-bóligi - 249-babynyń 1-bóligi, 28-babynyń 3-bóligi - 250-babynyń 1-bóliginde kózdelgen qylmystyq quqyqbuzýshylyqtar jasaǵany úshin kináli dep tanylyp, 13.02.2024 jylǵy úkimdi eskere otyryp,
QK-niń 58-baby 6-bóligin qoldana otyryp, ómir boiy memlekettik qyzmette qyzmet atqarý quqyǵynan aiyryla otyryp, 11 jylǵa bas bostandyǵynan aiyrýǵa sottaldy.
Sotta Mádeniet jáne sport ministrliginiń talaby qanaǵattandyrylyp, 3,5 mlrd. teńgeden asa somada keltirilgen zalal óndirildi. Úkim zańdy kúshine engen joq.
Aita keteiik, buǵan deiin de sot úkimimen Arystanbek Muhamediuly asa iri mólsherde para berýge oqtalǵany úshin kináli dep tanylyp, QK-niń 58-babynyń 3 jáne 6-bólikteri negizinde qylmystyq quqyqbuzýshylyqtar jiyntyǵy boiynsha ómir boiyna memlekettik qyzmette laýazymdardy atqarýǵa tyiym salynyp, 11 jylǵa bas bostandyǵynan aiyryldy.
Onyń áieli Ǵaliia Ysqaqova paraqorlyqqa deldaldyq jasaǵany úshin kináli dep tanylyp (QK 368-babynyń 1-bóligi), ómir boiy memlekettik qyzmette qyzmet atqarýǵa tyiym salynyp, 6 aiǵa bas bostandyǵynan aiyryldy. Advokat Tóleev asa iri mólsherde alaiaqtyq jasaǵany úshin kináli dep tanylyp (QK 190-baby 4-bóliginiń 2) tarmaǵy), 10 jyl merzimge advokattyq qyzmetpen ainalysý quqyǵynan jáne 6 jyl 8 aiǵa bas bostandyǵynan aiyryldy.
