استانانىڭ قىلمىستىق ىستەر جونىندەگى اۋدانارالىق سوتى ۇلتتىق مۋزەيدىڭ بۇرىنعى ديرەكتورى، ەكس-مينيستر ارىستانبەك مۇحامەديۇلىنا قاتىستى ۇكىم شىعاردى، - دەپ حابارلايدى Dalanews.kz.
ۇكىمدى استانانىڭ قىلمىستىق ىستەر جونىندەگى اۋدانارالىق سوتىنىڭ سۋدياسى كەمەڭگەر يماشيەۆ جاريالادى. سوتتا جىمقىرۋ ارقىلى بوتەننىڭ مۇلكىن ۇرلاۋ ارەكەتىن ۇيىمداستىرعانى جانە وعان جاردەمدەسكەنى ءۇشىن بىرنەشە ادامعا قاتىستى ۇكىم شىقتى.
"ارىستانبەك مۇحامەدي ۇلى مادەنيەت ءمينيسترى جانە ودان كەيىن ۇلتتىق مۋزەيدىڭ ديرەكتورى بولعان ۋاقىتىندا ۇرلىقتى ۇيىمداستىرۋشى بولا وتىرىپ، ءوزىنىڭ ورىنباسارلارىمەن الدىن الا ءسوز بايلاسۋ ارقىلى ادامدارمەن بىرگە، 2017-2019 جىلدار ارالىعىندا "الەم مۇراجايلارى بويىنشا التىن ادامنىڭ شەرۋى" حالىقارالىق كورمە جوباسىن ىسكە اسىرۋ شەڭبەرىندە "ە." ج ش س ديرەكتورىنىڭ ورىنباسارى مەن بۋحگالتەرىنىڭ كومەگىمەن 1،5 ملرد. تەڭگە سوماسىنا باعانى كوتەرۋ جولىمەن، ءىس جۇزىندە قىزمەت كورسەتپەي جانە تاۋاردى تيەپ-جونەلتپەي، اسا ءىرى مولشەردە بيۋدجەت اقشاسىن جۇمساۋ جولىمەن جىمقىرعان.
سونداي-اق، ول ن.-مەن الدىن الا ءسوز بايلاسۋ ارقىلى ادامدارمەن بىرگە 2017-2018 جىلدارى ۇلتتىق كينوكوللەكسيانى سيفرلاندىرۋدى جۇرگىزۋگە جالپى سوماسى 196 ملن. تەڭگەدەن اسا مەملەكەتتىك ساتىپ الۋ شارتتارىن جاساسۋ كەزىندە بيۋدجەت قاراجاتىن جىمقىردى.
ول ءوزىنىڭ قىزمەتتىك وكىلەتتىكتەرىن تەرىس پايدالانىپ، "سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى" رمقك-نى زاڭسىز جەكەشەلەندىرىپ، مەملەكەتكە 332 ملن. تەڭگە سوماسىنا اسا ءىرى مولشەردە زالال كەلتىردى (قك 361-بابى 4-بولىگىنىڭ 3) تارماعى)؛
"Ex." ج ش س ديرەكتورىمەن (جەكە وندىرىسكە بولىنگەن) 2019-2020 جىلدار ارالىعىندا "قازاقستاننىڭ ۇلتتىق كيەلى ورىندارى مەن مۇراجاي قورلارىن جالپىمەملەكەتتىك فوتوگراممەتريالىق 3D-سكانەرلەۋ" جوباسىن ىسكە اسىرۋعا جاسالعان مەملەكەتتىك ساتىپ الۋ تۋرالى شارتتار بويىنشا بولىنگەن 1،5 ملرد. تەڭگەدەن استام بيۋدجەت قاراجاتىن ۇرلاعان.
م.ا. "اكتەرەك لتد" ج ش س (ديپلومات ءقوناقۇيى) جارعىلىق كاپيتالىنىڭ 29 پايىز ۇلەسىن يەمدەنۋ تۇرىندە رەيدەرلىك ارەكەت جاساۋعا تىرىسقان"، - دەپ جازىلعان سوت مالىمەتىندە.
سوتتالۋشىلاردىڭ كىناسى جابىرلەنۋشىنىڭ، جابىرلەنۋشىنىڭ وكىلىنىڭ، كۋاگەرلەردىڭ ايعاقتارىمەن، ماماندار مەن ساراپشىنىڭ قورىتىندىلارىمەن، حاتتامالارمەن، سوتتالۋشىلار مەن كۋاگەرلەردىڭ جۇمىس ورنى بويىنشا ءتىنتۋ حاتتامالارىمەن، قىلمىستىق ءىستىڭ باسقا دا ماتەريالدارىمەن دالەلدەندى.
سوتتا پروكۋرور ايىپتى قولداپ، سوتتان سوتتالۋشىلارعا 2 جىلدان 12 جىلعا دەيىن باس بوستاندىعىنان ايىرۋ جازاسىن تاعايىنداۋدى، سونىمەن قاتار، ق ر مادەنيەت جانە سپورت مينيسترلىگىنىڭ جانە جابىرلەنۋشى ك.-نىڭ ماتەريالدىق زالالدى ءوندىرىپ الۋ تۋرالى ازاماتتىق تالابىن قاناعاتتاندىرۋدى سۇرادى. ال ادۆوكاتتار سوتتالۋشىلاردى اقتاۋدى سۇرادى.
سوت ۇكىمىمەن ارىستانبەك مۇحامەدي ۇلى قك-نىڭ 28-بابىنىڭ 3-بولىگى - 189-بابى 4-بولىگىنىڭ 2) تارماعى، 361-بابى 4-بولىگىنىڭ 3) تارماعى، 24-بابىنىڭ 3-بولىگى - 249-بابىنىڭ 1-بولىگى، 28-بابىنىڭ 3-بولىگى - 250-بابىنىڭ 1-بولىگىندە كوزدەلگەن قىلمىستىق قۇقىقبۇزۋشىلىقتار جاساعانى ءۇشىن كىنالى دەپ تانىلىپ، 13.02.2024 جىلعى ۇكىمدى ەسكەرە وتىرىپ،
قك-نىڭ 58-بابى 6-بولىگىن قولدانا وتىرىپ، ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلا وتىرىپ، 11 جىلعا باس بوستاندىعىنان ايىرۋعا سوتتالدى.
سوتتا مادەنيەت جانە سپورت مينيسترلىگىنىڭ تالابى قاناعاتتاندىرىلىپ، 3،5 ملرد. تەڭگەدەن اسا سومادا كەلتىرىلگەن زالال ءوندىرىلدى. ۇكىم زاڭدى كۇشىنە ەنگەن جوق.
ايتا كەتەيىك، بۇعان دەيىن دە سوت ۇكىمىمەن ارىستانبەك مۇحامەدي ۇلى اسا ءىرى مولشەردە پارا بەرۋگە وقتالعانى ءۇشىن كىنالى دەپ تانىلىپ، قك-نىڭ 58-بابىنىڭ 3 جانە 6-بولىكتەرى نەگىزىندە قىلمىستىق قۇقىقبۇزۋشىلىقتار جيىنتىعى بويىنشا ءومىر بويىنا مەملەكەتتىك قىزمەتتە لاۋازىمداردى اتقارۋعا تىيىم سالىنىپ، 11 جىلعا باس بوستاندىعىنان ايىرىلدى.
ونىڭ ايەلى عاليا ىسقاقوۆا پاراقورلىققا دەلدالدىق جاساعانى ءۇشىن كىنالى دەپ تانىلىپ (قك 368-بابىنىڭ 1-بولىگى)، ءومىر بويى مەملەكەتتىك قىزمەتتە قىزمەت اتقارۋعا تىيىم سالىنىپ، 6 ايعا باس بوستاندىعىنان ايىرىلدى. ادۆوكات تولەيەۆ اسا ءىرى مولشەردە الاياقتىق جاساعانى ءۇشىن كىنالى دەپ تانىلىپ (قك 190-بابى 4-بولىگىنىڭ 2) تارماعى)، 10 جىل مەرزىمگە ادۆوكاتتىق قىزمەتپەن اينالىسۋ قۇقىعىنان جانە 6 جىل 8 ايعا باس بوستاندىعىنان ايىرىلدى.
