Arys qalasy, Syrdariia eldi mekeninde ornalasqan S.Adambekov atyndaǵy mektep biyl «Aýyldyq aimaqtardaǵy tirek mektepterdiń áleýetin damytý» jobasyna engen bolatyn. Osyǵan sáikes, atalmysh mekteptiń biyl 32 kabineti men qosymsha bilim berý baǵyttary boiynsha stýdiialar tolyq jabdyqtaldy, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Búgin mektep qabyrǵasynda jobanyń saltanatty tanystyrylymy ótti. Sharaǵa Túrkistan oblysy ákiminiń orynbasary Beisenbai Tájibaev, qala ákimi Gúljan Qurmanbekova, Qazaqstannyń eńbek sińirgen ustazy Kúlásh Shámshidinova, «Qazaqstan Halqyna» qoǵamdyq qory tóraǵasynyń orynbasary Lázzat Shyńǵysbaeva men jobany júzege asyrǵan ardaqty azamattar men qala ustazdary qatysty.
Bul joba bilim berý sapasyn arttyrýǵa, aýyl mektepterine úzdik pedagogikalyq tájiribeler men tiimdi ádistemelerdi transfertteýge jáne tirek mektepterdiń qajetti materialdyq-tehnikalyq bazasymen qamtamasyz etýge baǵyttalǵan. Jobany Qazaqstan Respýblikasynyń oqý-aǵartý ministrligi, «Qazaqstan halqyna» qory, AITAS holdingi, Nazarbaev ziiatkerlik mektepteri men Bilim berý salasyn turaqty damytý qory iske asyrdy.
Sabaq arasyndaǵy úzilisti oqýshylar tiimdi ótkizý úshin rekreatsiialyq demalys aimaǵyna oqýshylarǵa arnalǵan oiyndary bar arnaiy oiyndar, shahmat aimaǵy, yńǵaily jihazdarmen tolyqqan. Sharaǵa qatysqan ustazdar men ardagerler jobany júzege asyrǵan azamattarǵa shynaiy alǵystaryn bildirdi.
Jumys sapary barysynda Beisenbai Dáýletuly Arys qalasy ákimimen birge Otyrar turǵyn aýdanynda boi kóterip jatqan 600 oryndyq bilim oshaǵyna bardy. Qurylys jumystarynyń sapasyn tekserdi.
Úsh qabatty mektep 4 gektar aýmaqta boi kótergen. Bilim ordasy zamanaýi talaptarǵa sai jabdyqtalatyn. Onda pándik kabinetter, tehnologiialyq dáris berý bólmeleri, sport, akt zaldar, syrtqy sport alańshalar, keń de jaily ashanasymen jabdyqtalyp, sáýlet-symbatymen kóz tartatyn úlgili bilim ordasyna ainalmaq. Búginde mektepke qajetti jabdyqtardy jetkizý jumystary qarqyndy júrgizilýde. Sondai-aq, jańa mektep tabiǵi gazben jylytý júiesine qosylady. Sonymen qatar mektep aýmaǵyn abattandyrý, jasyl jelekter otyrǵyzý jáne demalys aimaqtaryn qurý sharalary qolǵa alynǵan. Aralaý barysynda qurylysqa jaýapty
sala basshylary men merdigerlerge jumysty ýaqtyly ári sapaly aiaqtaýdy qatań tapsyrdy.
