Arys qalasynda «Jaily mektep» Ulttyq jobasy aiasynda 600 oryndyq mekteptiń qurylysy qarqyndy júrgizilýde. Zaman talabyna sai boi kóterip jatqan nysan jańa oqý jylynan bastap oqýshylardy qabyldaýǵa ázir. Nysandaǵy atqarylyp jatqan jumystarmen Túrkistan oblysynyń BAQ ókilderi shahar aýmaǵynda ótken baspasóz-týr barysynda tanysty, - dep habarlaidy Dalanews.kz
Jobaǵa sáikes, bilim ordasynda eki sport zal, keń kólemdegi akt zaly, kitaphana, májilis zaldary, pándik kabinetter, zerthanalar, sheberhanalar men kovorking-aimaqtar bar. Sonymen qatar, mektep aýlasynda standartqa sai fýtbol alańy da salynýda. Qazirgi tańda qurylys jumystary 80 paiyzǵa oryndalǵan.
Sondai-aq, qalaǵa qarasty Aqdala aýylynda úlken sport kesheni boi kóterýde. «Aýyl – el besigi» baǵdarlamasy aiasynda salynyp jatqan bul keshen — Aqdaladaǵy alǵashqy sporttyq nysan. Qurylys jumystary byltyr bastalǵan. Biyl tolyq aiaqtalyp, el igiligine beriledi dep kútilýde. Jalpy aýmaǵy 371 sharshy metrden asatyn keshen keń ári jaryq. Ishki jabyndysy sapaly materialdan jasalyp, syrtqy qabyrǵalary jylý ustaityn metall saidingpen qaptalýda. Onda meditsinalyq pýnkt, kiim aýystyratyn bólmeler men ishki sanitarlyq toraptar qarastyrylǵan. Sport zaly bir mezgilde 100-den astam adamdy qabyldai alady. Aýyl jastary endi voleibol, basketbol, boks, kúres, ústel tennisi men gimnastika syndy sport túrlerimen ainalysýǵa múmkindik almaq.
BAQ ókilderi kelesi kezekte Arys qalasyndaǵy «Barys» shaǵyn aýdanyndaǵy jeke investordyń qoldaýymen salynyp jatqan kópqabatty turǵyn úi keshenimen tanysty. Qazir onda 60 páterli eki turǵyn úidiń qurylys-montajdaý jumystary qyzý júrip jatyr. Jalpy aýdany 3348 sharshy metrdi quraityn bul nysandy «Lider-NS Stroi» JShS salýda. Keshenniń alǵashqy úii biyl paidalanýǵa berilmek.
