Bul týraly ol Reformalar jónindegi Joǵarǵy Keńestiń otyrysynda 2021-2025 jyldarǵa arnalǵan jekeshelendirý jospary jobasyn tanystyrý kezinde málimdedi.
Memleket basshysynyń buǵan deiin bergen tapsyrmasyna sáikes, tolyqtai nemese jartylai jeke básekelestik sektorǵa ótetin uiymdardyń sany 176-dan 736-ǵa deiin ulǵaidy.
Básekelestik ortaǵa 5 trillion teńge kólemindegi aktivterdiń berilýi memlekettiń ekonomikaǵa aralasýyn 14 paiyzǵa deiin qysqartýǵa múmkindik beredi. Osyǵan orai strategiialyq investorlar tartylyp, shaǵyn jáne orta biznestiń jekeshelendiriletin kompaniialardyń qyzmetine qoljetimdiligi saqtalady jáne keńeiedi.
Prezident aldyńǵy jekeshelendirý kezindegi nysandardyń basym bóligi birshama keiinge shegerilgen nemese múlde alynyp tastalǵan tájiribeni eske saldy.
– Jumystyń jospar boiynsha júrýi asa mańyzdy. Bul turǵyda Úkimettiń ustanymy qatań bolýy qajet. Jekeshelendirýdiń sońy jeke monopoliialardyń paida bolýyna ákep soqtyrmaýy kerek. Ondai jaǵdai qoǵamnyń narazylyǵyn týdyrady. Jekeshelendirý úderisi kezinde ashyqtyq pen ádildikti qamtamasyz etý qajet, – dedi Memleket basshysy.
Osy rette Prezident Úkimetke nysandardy satýǵa qoǵamdyq monitoring júrgizýdiń tetikterin ázirleýdi tapsyrdy.
– "Halyqtyq IPO" baǵdarlamasyn qaita jańǵyrtyp, aktsiialardy, eń aldymen, jeke tulǵalarǵa, iaǵni, Qazaqstan azamattaryna satý kerek. Elimizdiń árbir azamatynda ulttyq bailyqtyń bir bóligin ielený múmkindigi bolýy qajet, – dedi Qasym-Jomart Toqaev.
