Aral aýdanynda Uly Jeńistiń 80 jyldyǵy merekesinde Qyzylorda oblysynyń ákimi Nurlybek Nálibaevtyń qatysýymen temirjol arqyly ótetin aspaly kópir ashyldy, dep habarlaidy Dalanews.kz
Oǵan Parlament Senaty men Májilisiniń depýtattary Naýryzbai Baiqadamov, Rýslan Rústemov, Murat Ábenov, Marhabat Jaiymbetov, Murat Ergeshbaev, memleket jáne qoǵam qairatkeri Qudaibergen Sarjanov, ziialy qaýym ókilderi men el aǵalary qatysty.
Aimaq basshysy aýdan turǵyndaryn Uly Jeńistiń 80 jyldyǵymen jáne jańa kópirdiń ashylýymen quttyqtady.
«Búgingi mereili merekede quny 3 mlrd 140 mln teńge, uzyndyǵy 940 metr bolatyn aspaly kópirdi saltanatty túrde ashyp, el igiligine tabystaimyz. Bul – araldyq aǵaiynnyń kópten kútken armany! Buryn poiyz ótkende temirjoldyń eki betindegi kólikter kepteliste saǵattap kútetin. Jergilikti turǵyndardyń uzaq jyldan beri qordalanǵan basty máselesiniń oń sheshim tabýy – biz úshin úlken jetistik ári maqtanysh. Aspaly kópirge jaiaý júrginshiler joly, túngi jaryqshamdar ornatyldy. Jańa kópir – Araldyń bolashaǵyna jol ashatyn, el igiligine qyzmet etetin altyn kópirge ainalsyn! Barshańyzǵa amandyq, jasampaz isterimizge tolaǵai tabys tileimin!» – dedi Nurlybek Mashbekuly.
Rásimde Májilis depýtaty Marhabat Jaiymbetuly quttyqtaý sóz sóilep, memleket jáne qoǵam qairatkeri Qudaibergen Sarjanov batasyn berdi. Aimaqtyń áleýmettik-ekonomikalyq damýyna úles qosqan azamattar «Qyzylorda oblysynyń damýyna qosqan úlesi úshin» medalimen marapattaldy. Sondai-aq, aspaly kópirdi salǵan merdiger mekeme qyzmetkerlerine oblys ákiminiń Alǵys haty tabystaldy.
Aita keteiik, Aral aýdany keiingi jyldary qarqyndy damyp keledi. Eki jyl buryn aýdan biýdjeti 10,1 mlrd teńge bolsa, búginde 22 mlrd teńgeden asty. Úsh jyl ishinde 80 mlrd teńgege jýyq investitsiia tartyldy.
Osy kezeńde 80 shaqyrym aýyz sý jelisi jańartylyp, halyqtyń 96 paiyzy taza aýyz sýmen qamtyldy. Sonymen qatar, turǵyndardyń 71 paiyzy «kógildir otynnyń» igiligin kórýde. Araldyń Syr betkeiindegi eldi mekenderdi gazdandyrý maqsatynda «Qamystybas» aýylynda avtomattandyrylǵan gaz taratý stantsiiasynyń qurylysy bastaldy.
«Jaily mektep» ulttyq jobasy aiasynda salynǵan 10 mekteptiń 2-eýi Aral aýdanynda boi kóterdi. «Aýylda densaýlyq saqtaýdy jańǵyrtý» ulttyq jobasymen 3 ambýlatoriia paidalanýǵa berildi. Sonymen qatar, quny 4,1 mlrd teńge bolatyn aýdandyq aýrýhananyń qosymsha ǵimaraty men juqpaly aýrýlar bólimshesiniń qurylysy bastaldy. Oblystyq biýdjet esebinen «Sekseýil» kentinde 40 tósektik aýrýhana ashyldy. Jaqyn kúnderi Aral qalasynda «Rýhaniiat ortalyǵy» men «Qamqorlyq» ońaltý ortalyǵy iske qosylmaq.
